台灣組合飛輪海呢個月27同28號喺紅館舉行「飛輪海想入飛飛演唱會2009」，佢哋噚日喺香港W 酒店舉行記者會，成員汪東城因有工作在身，所以未能來港。噚日朝早約11點，飛輪海三子吳尊、炎亞綸同辰亦儒抵達赤鱲角機場，半百歌迷一早等候，現場有十幾個保安保護佢哋，但場面依然混亂。
飛輪海噚日抵港時，被大班fans 重重包圍，場面混亂。
飛輪海成員吳尊、炎亞綸同辰亦儒對於有機會喺紅館開演唱會，覺得興奮又緊張。
楊丞琳起紅疹
對於相隔唔夠半年再喺香港開演唱會，辰亦儒喺記者會度話好感激歌迷支持，加上今次喺紅館舉行，覺得有美夢成真嘅感覺。吳尊就應承fans 會唱多啲新歌，又話如果露肉就一定要四個人一齊露，否則佢會撕爛其他成員嘅衫，相信歌迷最想睇到呢一幕。飛輪海又被問到情人節點樣過，吳尊話當日嘅情人就係其他三位成員同歌迷，因為過日要出席三個活動喎。炎亞綸即講笑話公司怕佢哋亂咁約會，所以安排好工作畀佢哋。飛輪海又大談擇偶條件，吳尊話：「希望女友簡單自然。」炎亞綸想搵個溝通到嘅女仔，辰亦儒就鍾意溫柔又有氣質嘅。吳尊話會請好友蔡卓妍（阿Sa ）睇演唱會，又話阿Sa 喺台灣拍劇時都有互相打電話拜年。此外，汪東城噚日喺台灣同楊丞琳宣傳新劇，但佢哋齊齊抱恙，楊丞琳狂咳，大東就流鼻水。大東送咗頂帽畀楊丞琳做禮物，楊丞琳怕醜到滿臉通紅，條頸更突然起紅疹添。
冇嚟香港嘅汪東城噚日同楊丞琳喺台灣宣傳，楊丞琳收到禮物後，條頸突然起晒紅疹（小圖）。
from
http://appledaily.atnext. ... art_id=12171116
