無《崖上的波兒》、《家有囍事2009 》阻頭阻勢，《赤壁：決戰天下》喺台灣獨領風騷，雖然無敵是最寂寞最是痛苦，但「小喬」林志玲繼續為票房加油，喺大年初五，包下六間放映室，合共二百幾個座位，請晒班姨媽姑姐表叔舅公睇佢台戲。
打扮忽然師奶嘅林志玲，為台灣票房而努力，事關香港檔期早被多套賀歲片削弱；而大陸有套自製動畫片《喜羊羊與灰太郎》，同樣大收旺場，令《赤壁：決戰天下》嘅唯一谷飛希望，只能落喺台灣及「三國迷」嘅日本身上。
邱士楷
負責分飛
一次過包起二百幾張下午兩點半場飛，全部唔使林志玲俾錢，而係同佢合作咗四年嘅「浪琴錶」做老細埋單。
人多易混亂，林氏一家四口分頭行事，阿爸阿媽喺外圍維持秩序，阿哥林志鴻就孖住細妹，充當票務員，分飛俾親友。
其間，有唔少圍觀市民「搏大霧」，以為行埋去講兩句就有免費飛派，但由於講唔出親友姓名，最終過唔到林志玲終極驗證一關，自己嗱嚟瘀。
林志玲媽咪吳慈美（右一）知道阿女搏殺唔願嫁，所以同記者彈咗句：「急不得！」邱士楷（小圖），再等吓啦！
牛年祈福
足足用咗半個鐘先派晒飛，開場前，林志玲話個心愈來愈緊張，「好害羞哦！跟親友一起看電影好緊張。」
又唔係睇鬼片，雖然唔知林志玲有乜好緊張，但佢阿媽吳慈美就最緊張個女嫁唔出。
與馬桶太子爺邱士楷婚事傳足兩年，林志玲仲未嫁得出，所以喺牛年前夕，林媽媽入廟拜神祈福，重點祈求個女牛年有個好歸宿。至於今日咁齊人，邱士楷點解唔嚟捧場，林志玲助手好坦白咁話：「都知道你（指記者）要來，怎麼可能找他。」
真假親友一窩蜂埋嚟嗱飛，加埋大批路過fans 要拍低第一名模風采，林志玲阿哥林志鴻（四眼）唯有幫手做實Q 同分飛。
