憑34D 巨咪炸爆娛樂圈的趙碩之，雖然被指隆胸，但她一於少理，繼續擺出戰鬥格，爆響口牛年添食拍攝更hot 寫真集證明身材夠堅；擁32C 上圍的小師妹尹蓁晞也不輸蝕，渴望升cup 火併趙碩之，至於慘被兩位師妹迎頭痛擊的師姐戴夢夢，只能避戰轉撈唱作人。
大名娛樂大師姐戴夢夢、二師姐趙碩之和小師妹尹蓁晞（Yumi ），去年經歷不和、不屑、互罵的階段後反而關係昇華，越來越老友。挾34D 上圍出位的趙碩之（Wylie ）去年拍下三點式噴血寫真，橫掃書展，現時她已準備加入樂壇做09新人，她說：「好興奮呀，我會出個人新碟，做今年嘅新人。除咗唱歌，都會再出寫真集，今年想玩再hot 啲，舊年咁健康，好多人接受，所以唔擔心有人會覺得我賣弄。」
擔心再有是非
去年推出寫真集橫掃書展的趙碩之有意再下一城，更揚言新寫真要再玩hot 啲。
Wylie 曾多次被指是假胸，她擔心新一年不利新聞繼續有嚟，她說：「其實都驚，因為觀眾唔知真定假，自己都有擔心，傳媒有疑問，我仲諗點樣先可以證明，我真係冇整過，但係我唔識點證明，所以只可以一笑置之。」小師妹尹蓁晞一入行就被師姐戴夢夢鬧不思進取，她也知道自己遊魂累事，希望重新改過，及跟趙碩之勇闖樂壇，Yumi 說：「師姐話完我都知錯，我而家好勤力練歌。」她又計劃跟趙碩之出一本寫真集，Yumi 說：「我都有32C ，不過我好似太瘦，我唔知會唔會再發育，不過都想自己肥番少少，我一肥就會肥喺個胸先，肥番會好睇啲。」
戴夢夢要力追
左起：趙碩之、戴夢夢與尹蓁晞去年曾鬧不和，如今已冰釋前嫌互相扶持。
大師姐戴夢夢揚言對兩位師妹非常嚴謹，對於過去一年跟師妹不和，夢夢說：「我覺得唔算係是非，大家日對夜對，而家仲成為好朋友，相處得好開心，話佢哋都係想佢哋好。」見師妹迎頭趕上，夢夢希望今年能急起直追，她說：「舊年犯太歲，年頭幾順利，之後要轉新公司，都停咗，新一年希望順利得到更多人認同，仲有身體健康，最想就係做一個唱作人。」採訪：楊潔雯 攝影：陳慧安服裝提供：Pinko場地提供：鑽石山荷里活廣場
小師妹尹蓁晞（左）以32C 的火辣身形挑戰趙碩之，更聲言要增磅豐胸。
http://appledaily.atnext. ... art_id=12145273
