新年最有建樹之事，莫過於恭喜發財，利是
來。
難得娛樂圈有個不明文規條，就係未婚藝人都要做財神，大派開工利是。更難得嘅係呢班娛圈財神，毋懼金融海嘯，利是唔縮反漲，為牛年應景，個個要做「派牛勇士」，紓緩民困。
經濟低迷，政府話要刺激消費，高官做場大龍鳳去女人街買十打毛巾，倒不如效法鄺美雲慷慨派金，員工每封最少一萬，十分和味。
做鄺美雲（Cally ）寵物已經夠幸福，事關佢隻心肝寶貝犬Cash 唔使勞碌，日日享福，主人Cally 每年都會派幾千蚊利是俾佢，絕對唔係小兒科。但原來幫Cally 打工仲幸福，Cally 珠寶公司旗下幾名員工，家中傭人同司機共十人，每人都獲派$10,000 嘅超級大利是過肥年，工作表現好的更超過此數。聽完之後真係好想問Cally 一句，你公司仲有無職位空缺呢？
有Cash 萬事足嘅Cally ，連自家設計利是封都以愛犬做嘜頭。見到Cash 個樣成個笑口棗咁，加上「現金到」個名，個個收到都四萬咁口。
新年派廿萬
經濟低迷仍然出手咁豪，Cally 解釋：「員工幫公司搏殺，返屋企對得最耐嘅就係工人，唔對佢哋好啲又點得，所以就算今年市道差咗，但一年一次利是我堅持唔會縮水，照舊五位數字一封，其他朋友就派$1,000 ，唔熟嘅朋友就$100 ，每年預利是錢都要廿萬。」今年年初二Cally 更帶埋Cash 去老人院派利是，每封$100 ，所以牛年利是開支比往年更多，肯定超過廿萬。
Cash 的知名度並不低於主人Cally ，途人見到Cash 除拿出手機大拍特拍外，更不停叫Cash 的名字來引牠注意，Cally 對途人嘅熱情反應早已見怪不怪，她說：「同佢出親街都有咁情況。」
錫Cash 錫到燶的Cally ，新正頭俾利是當然唔手軟，雖然Cash 嘅利是錢最終都會捐出做善事，但好識性嘅Cash 收到大利是一樣好開心，即時錫錫主人，令Cally 甜入心。
老闆大手筆 楊受成多講多得
雖然英皇老闆楊受成每年開工利是只係象徵式$100 ，但其實佢袋住多封金牛利是「隨時候命」。一班英皇藝人亦係奪寶奇兵，知道只要對老闆講多幾句啱聽恭賀說話，就再醒你金牛一封，甚至多講多得，派完即止。
林建岳一視同仁
傳聞俾片酬永不低手嘅東亞娛樂老闆林建岳，新年派開工利是同樣闊綽，唔使任何要求，上上下下每位派$1,000 。
Paco 校啱時辰
Paco 每年都派500 蚊開工利是，不過要
得呢封新年財，最好係黃昏前。事關佢晚晚都有「Paco 飯局」，而且鍾意飲酒，好多時未正式晚飯就醉到大覺訓，所以
Paco 利是就要趁早。
陳敏之利是玩三級
三級利是：$500 $100 $20
手指有長短，利是亦要分等級，多年來陳敏之利是三級制維持不變，就算面對金融海嘯亦唔會縮水，一如以往共花二萬元封利是。不過陳敏之唔係見高層派$500 ，低層就$20 ，而係剛剛相反，輩份愈細，地位低微，反而成為大利是得益者。「髮型屋嘅斟茶掃地阿姐，看更阿伯同我啲表姨甥，都係我俾VIP 利是嘅對象。因為掃地阿姐收入唔高，我俾大封啲，希望佢可以買到有需要嘅嘢。而親戚嘅小朋友，就當俾獎學金，鼓勵佢哋讀書。反而派俾同行就一律20 蚊，唔會大細超。」
咪睇陳敏之同大隻佬黃德斌係成年人，查實童心未泯，用嘅利是封都cute 過人。好似未嫁但已經有4 年派利是經驗嘅陳敏之，年年例牌用佢至愛Winnie the Pooh 作為佢VIP 利是，內藏大牛或紅衫魚。至於首年派利是嘅黃德斌，竟然用Q 版招財貓利是封，認真搞笑。
抽大利是
本來派俾藝人一律廿蚊嘅陳敏之，開工影相就遇見黃德斌，見對方不停賣口乖祝佢青春常駐，就決定俾啲甜頭對方，手持四封唔同「餡料」，分別係$500 ，$100 ，同兩封$20 利是俾德斌抽（抽大利是，上文已提供貼士）。
起初德斌一揀就揀中內藏$500 嘅Winnie the Pooh 利是封，點知正想抽出時俾陳敏之假表情擾亂決定，最終改變主意揀米奇。
錯誤決定影響新年進帳，三心兩意嘅黃德斌最後揀來安慰獎$20 ，喊都無謂。算啦德斌，你派俾人都係$20 ，同敏之打個和啫。
賺蝕同價
開工利是係人工以外嘅額外獎金，做打工仔當然希望愈多愈好。不過好似去年賺成五億都要裁員嘅無線，寧願花成本做封內有套，套內又藝員相嘅利是封，都唔願將開工利是加碼，一律$20 。至於亞視及有線電視，都好似同無線夾定咁，人人$20 ，亞視仲慳到沿用去年的利是封，可能出年都係。
派利是點嚟？
新年派利是習俗起源於古時有一種凶獸叫「年」，牠在第365 日夜晚就會出來傷害人畜及莊稼。大人會燃燒爆竹驅「年」外，亦以食物安慰小孩，即為「壓驚」。久而久之，人民以貨幣代食物，才演變叫「壓歲錢」，因紅色在中國代表喜慶，認為以喜驅邪，故之後新年都將錢幣放入紅色紙套，即是今日的紅封包，廣東話稱為利是。
王祖藍 福音利是藏CD
拍劇主持兼出埋唱片嘅王祖藍，今年處男派利是表面因為事業起飛，所以回饋支持佢嘅人，但實質係藉派利是傳福音。訪問當日，因為返電視城巧遇一位「假眼人」（在眼蓋劃上眼睛的化妝師），對方無預料祖藍會派利是，但祖藍已經嗱出印有福音字句嘅利是派俾對方，繼而搵位同佢講耶穌！
「假眼人」發現福音利是內藏「硬嘢」，覺得事有蹺蹊，當面拆利是先知祖藍除咗封$20 ，仲有小冊子同迷你CD 送。首次收啲咁特別嘅利是，嚇到「假眼人」O 嘴兼「眼突」。
祖藍話佢派嘅利是物輕情義重，而且內藏三寶。「有$20 ，亦有林以諾牧師撰寫嘅福音小冊子，仲有隻CD ，不過唔係我出嗰隻，係張堅庭講道CD 。」
孫耀威金牛勇士
縱然遇上金融海嘯，但孫耀威（Eric ）都無縮水，仍然向每位同事派$2,000 利是。市道低迷仲咁豪爽，Eric 話：「派利是意義就係要開心，班同事成年幫你搏殺，雖然金融海嘯對收入唔多唔少都有影響，但利是一年一次，寧願自己慳啲都要獎勵下佢哋。不過咁大手筆都只限於唱片公司十幾個同事，仲有化妝整頭。其他就一律$100 封。單係封利是都使咗超過五萬蚊。唔緊要，錢總會搵得番。」如果人人咁諗就好喇。
在內地拍劇多年，然後回歸香港樂壇嘅孫耀威，因去年向唱片公司同事大派$2,000 一封大利是成樂壇佳話。所以今年嗰班同事一見Eric ，就好似螞蟻嬲蜜糖咁，希望喺一片經濟低迷下，為佢哋帶來曙光。
利是升跌
新婚Kelly $2,000
結婚時Kelly 既向傳媒大派嫁女餅，仲喺婚宴場外設自助餐慰勞採訪記者。向來唔吝嗇嘅佢派利是都闊綽過人，未嫁時已經花10 萬蚊封利是，每封都係金牛，今年更加係首年以劉太身份派利是，所以打孖上，兩封金牛賀新春。
縮水阿Sa $1,000
英皇阿哥阿姐中，出手最豪嗰個唔係容祖兒或住近億豪宅嘅謝霆鋒，而係蔡卓妍。正當兩位前輩年年例牌一舊水，出道第2 年嘅阿Sa 已經好鬼豪，喺公司每人大派$1,000 利是，拍檔阿嬌都只係派$500 。喺佢賺到盤滿缽滿時，新年利是更一度加碼至每封$2,000 。不過隨住去年Twins 因阿嬌慾照事件停工，影響收入，加埋金融海嘯要減價接job ，阿Sa 今年派利是雖然有回落，但每封仍有一張金牛。
暴漲阿Kay $500
上年謝安琪派$100 開工利是，今年因為〈囍帖街〉贏到開巷，樂壇上位，為報答一班勞苦功高嘅同事，佢由$100 蚊跳升到$500 ，對一向慳家嘅佢，已經好大手筆。
