[資訊分享] 港男的感情煩惱

1.我女朋友成日對我呼呼喝喝，又勁使我錢，要我買袋買衫，仲要我儲錢同佢結婚，我邊嚟咁多錢？

我話你聽，拍拖等同食藥，往後劑量只會不斷增加，唔會減少。你依家對佢咁好，佢就會要求你更好，你一個月為佢使一萬，出年就會通脹到萬三……結婚本身已經要使一截，結咗婚，你使嘅錢只會更多，唔會更少。冇咁大個頭唔好戴咁大頂帽，冇咁多錢唔好溝咁大使嘅女，我係你，一就更俾心機搵錢，一係就搵過個唔使要你買袋買衫嘅女朋友，如果唔係，你遲早爆煲，到時女又冇，婚又結唔到，錢又冇晒，盞死。
王貽興
貽情盡興

2.我本身有女朋友，前排識咗個女仔，佢都有男朋友，起初大家都有默契，明知係遊戲一場，但個女仔忽然間玩認真，同佢男朋友分咗手，仲話要同我一齊，咁點好？

有咁耐風流有咁耐折墮，出得嚟玩，預咗要還。你以為女仔真係肯咁樣同你玩落去呀？可能因為你扮得太認真，太好戲，所以令對方誤會，決意要為你犧牲一切，同你雙宿雙棲囉。冇得算㗎啦，撼得就撼，撼唔到，預咗兩個都冇㗎啦。
我反而覺得，你正印知道，你一定死梗，佢一定唔會同你一齊，既然係咁，倒不如同正印分手，就要呢個，至少，你都叫做有一個，總好過一拍兩散，兩個都冇。

3.有次陪女朋友見佢班姊妹，之後佢其中一個friend 問我嗱咗電話，之後就成日借啲意sms 我，問我呢樣嗰樣，仲成日flirt 我，但成班人出嚟又扮唔熟。

女朋友嘅朋友冇女朋友家姐細妹咁麻煩，要偷跳亦都冇想象中咁困難。不過，你要小心，咁樣玩得，就預咗一拍兩散，因為，被人識破嘅危機會比其他情況大好多。你要預咗個女仔可能經常會有情緒波動，例如突然喊晒同你講，佢覺得自己好卑鄙好衰，同你女朋友行街食飯但一路隱瞞住好辛苦……除非你真係enjoy handle 呢種關係，覺得咁無間道嘅愛情特別刺激特別實在，否則，都係忍吓啦，分咗手一齊咪唔使咁煩囉。
奉勸一句，男人嘅嘢，為食係天性，唔怪得你，但響度食唔好響度屙，呢點你控制唔到，就係閣下嘅自制力問題。

4.我同條女搞嘢冇feel ，但佢平時又聽聽話話，飛佢又好似好衰咁，點好？

咩年紀嘅男人都鹹濕，如果你同佢一齊，發覺寧願自瀆都唔願同佢做愛，咁你真係應該正視呢個問題。冇feel 係因為點解先？佢太保守？太冷感？你唔掂？定係佢嘅外表挑唔起你嘅性慾？
如果真係因為最後嘅原因，咁你偷食係遲早嘅事，不如早啲分手罷啦。做開口講分手嘅衰人，好過做偷食被人發現嘅衰人。後者比前者衰多兩錢。

後記：本文為此專欄最後一期。能夠在《忽周》跟大家分享兩性心得，這一年來我非常愜意。感謝所有喜歡我的文章並且會在網上轉載，或者在街上主動跟我打招呼支持鼓勵的朋友。新的一年，希望大家都能無憂地愛，盡情追尋幸福。後會有期。