佢一見到部名車，摸完又揸，都冇所謂，但佢竟坐上車門，鞋踭係咁響車身磨嚟磨去，心痛死個車主啦！
係人都知一部法拉利跑車，閒閒哋都要成二、三百萬。雖然車係要嚟揸，刮花、撞傷少不免。但借架車出嚟拍廣告，俾個靚女監生蹧躓，就真係冇仇報。
Kama 農曆新年將會在日本工作，所以出發前要完成新廣告拍攝。當日由早上拍至晚上，響海邊食足十幾粒鐘風，你都咪話搵錢唔辛苦。
上兩個星期六（1 月17 日），邦民女Kama 響西九龍直升機場，同「一蚊雞」游茛維拍攝電訊廣告。當日除咗佢兩個之外，仲出動咗二架借番嚟嘅靚車一齊拍。舊年先考到車牌嘅Kama ，見到身旁架黑色法拉利，即刻搶住跳上司機位試坐，響架車入面左篤右摸。咁都未算，拍完一個鏡頭後Kama 唔知係唔係企得太攰，竟然成個人坐咗上隻車門度，兩隻著住高踭鞋嘅腳，不時響車身上fing 吓fing 吓，媽咪姐睇到都戥個車主心痛。
