飽受綠帽疑雲事件影響的庾澄慶（哈林），最近來港為無線添食拍攝遊戲節目《耳分高下》，一於寄情工作搵真銀。新一輯節目哈林依然有8位樣靚身材正的「Sing 之天使」傍住，繼上一輯「味之天使」濟南妹賈曉晨JJ 成功跑出後，今次同樣有國產天使「藍莓」劉俐（Kibby ）做JJ 接班人。
福建妹藍莓唔止索爆，仲交遊廣闊，記者發現佢同一班名人二代非常老友，在其facebook 內有唔少夜蒲合照，而且仲有多張著三點式攬仔嘅火辣照片。內外都咁open ，睇嚟藍莓應該會係「Sing 之天使」中最快彈起嘅一個。
8位「Sing 之天使」入面，以藍莓劉俐身形最高瘦，不過佢成日都話嫌自己肥，又話自己有「暴食症」。對於被指捧做JJ 接班人，她說：「我冇諗過好似JJ 咁可以紅得咁快，但係大家都鍾意搵我同JJ 比，可能大家覺得我行緊佢嘅路線，但係我會做番自己。」
姓名：劉俐Kibby
出生日期：1989 年9 月17 日（19 歲）
身高：174cm
體重：113lbs
三圍：32 、24 、35
學歷：中學畢業
入行經過：7 年前與家人從福建來港，2 年前中學畢業後開始做兼職模特兒，經模特兒公司介紹下成功成為「Sing 之天使」。
演出經驗：08 婚紗展catwalk show 、古巨基《愛回家》MV 、強積金電視廣告。
上一輯有「士多啤梨蘋果橙」，新一輯更玩齊八款生果，8 位「Sing 之天使」話面試時監製問佢哋覺得自己最似咩生果，結果大部分就變成自己嘅代號。
擁有43 吋長腿嘅劉俐做兼職模特兒時就已經成為唔少「炮男」嘅寵兒，嚟到影樓佢仲自動波盡晒誘人S 腰，連攝影師都大讚佢夠專業。
賈曉晨JJ ：想學我上位？要俾人扑頭㗎！（設計對白）
「Sing 之天使」除咗有一套格仔露腰迷你裙制服外，仲有一套連身短裙晚裝。制服誘惑真係引死唔少「電車男」。
藍莓：我太鍾意玩
新一輯《耳分高下》在2 月2 日才正式推出，但8 位「Sing 之天使」已經備受注目，當中大受「電車男」歡迎，人見人愛大讚索爆的藍莓劉俐（Kibby ），原來亦喜歡把自己與朋友的夜蒲照及火辣照上載於facebook 內。難得藍莓唔介意公諸同好，「啲相入面嘅男仔全部都係我朋友，啲相影得好親密？其實我同全部男女朋友都玩得好close ，係好朋友先會咁做。男朋友？我真係冇諗過搵佢哋做男朋友，因為我太鍾意玩，我寧願同佢哋做朋友都唔會拍拖。」
除咗親熱合照之外，交遊廣闊嘅藍莓同唔少名人二代玩得好埋，當中以四太女何超盈（Sabrina ）及寇鴻萍女唐貝詩（Lydia ）嘅合照最多。「我自己平時唔係咁鍾意影相，但係出去夜場一大班朋友玩得開心，就會影低留念。我同Sabrina 、Lydia 、Howard （林建名兒子林孝信）、Carman （楊海成女兒楊嘉明）都係識咗好耐嘅朋友，我識佢哋嘅時候大家都唔知大家嘅背景。佢哋喺外國讀書好少返香港，呢排先玩多咗，其實除咗去夜場玩，我哋都有好多正常嘅活動，好似食飯同燒嘢食，不過冇影相之嘛！」
波壓壯男 在藍莓facebook 內，有多張三點式攬仔火辣照。相中藍莓正貼身胸壓壯男，搞到個胸都變晒形。咁open ，唔怪得佢話同個個朋友都玩得埋啦！
三點式任攬 S 身形的藍莓胸壓完壯男，即刻嘟嘴攬住粗眉俊男，態度親密。
床上照 充滿自信嘅藍莓將一張大露背只圍毛巾嘅玉照放上網，背景仲要似足酒店房，真係令人充滿遐想。
孖住林孝信 藍莓同林建名大仔林孝信好老友，兩人在夜店中頭貼頭合照。
同超盈鬥姣 「已經瘦晒」嘅超盈（左）與藍莓扮姣擺pose ，十分搞笑。
激咀唐貝詩 喺藍莓
facebook 內，不乏與唐貝詩的互啜相。
勁冧楊嘉明 當中一張相是攝於遊艇內，藍莓與楊海成中性打扮之女楊嘉明攬頭攬頸，相信兩人交情非淺。
藍莓facebook 激相簿
小春鹹豬手疑雲 06 年小春被指跳舞時用手指掃到Yuri 波邊，不過Yuri 話只係一場誤會。
柑桔 惹火dancer
姓名：陳蕊蕊Yuri
出生日期：1984 年9 月8 日（24 歲）
身高：169cm
體重：112lbs
三圍：34 、25 、35
學歷：美術專科學校
入行經過：兩年多前美術專科畢業，加入無線做全職舞蹈員，後經朋友介紹認識《耳分高下》監製錢國偉，面試後正式成為Sing 之天使。
演出經驗：02 年《Twins Ichiban 興奮演唱會》，成為八名主力舞蹈員之一。04 年《Twins 零4 好玩演唱會》再任舞蹈員。之後加入無線舞蹈組，經常為不同藝人伴舞。
每次「柑桔」陳蕊蕊（Yuri ）一出場，便會成為在場男士嘅焦點，除咗因為佢擁有34 吋胸夠「偉大」外，亦因為舞蹈藝員出身嘅蕊蕊舞功了得，曾為不少歌星伴舞。有報道指06 年Yuri 為陳小春伴舞時，懷疑被對方鹹豬手。問番Yuri 當年嘅感受，佢就相當大方咁話，「其實嗰次我真係feel 唔到，可能係張相嘅角度問題，總之真係掂唔到，其實有時跳舞都有機會唔小心掂到，不過大家都會小心囉。」
監製錢國偉
去年王淑玲（左二）孭重飛，與周國賢（左一）及Juno （右一）合作拍《日本東北咁過祭》。
青蕉 監製愛將
姓名：王淑玲Vanko
出生日期：1989 年12 月27 日（19 歲）
身高：169cm
體重：100lbs
三圍：32 、24 、33
學歷：IVE
入行經過：14 歲時被模特兒公司Jamcast 的星探發掘，一直任兼職模特兒，去年經模特兒公司推薦面試《四葉草之盛裝舞步愛作戰》後，簽約無線成為合約藝員。
演出經驗：曾演出廣告包括麥當勞、雪碧、聯邦酒樓、萬寧及無線2008 香港小姐招募。另外，曾演出劇集《四葉草之盛裝舞步愛作戰》、遊旅特輯《日本東北咁過祭》及古巨基《勁歌金曲》MV 。
王淑玲去年已成為無線親生女，深得監製錢國偉重用，更被點名做天使中的班長，所有聯絡事務都由佢負責。「我同公司簽咗五年合約，希望呢段時間可以做到啲成績，我知道呢行啲競爭好大，所以會更加珍惜今次機會。我嘅奮鬥目標係楊怡，佢由訓練班開始，10 年嚟冇靠過緋聞同是非上位，只係好努力咁演戲。我當然想好似上輯嘅JJ 咁出到位啦，但係我冇身材，惟有靠笑容啦！我真係好多謝監製再次用我，不過我唔怕同佢傳緋聞，佢對我呢啲妹妹冇興趣嘅。」
身材最細粒嘅雪梨Coffee ，做拱橋時露出黑bra 同胸墊，抹枱時洩春光都在所不計，認真夠搏。
雪梨 軟骨功取勝
姓名：林婉霞Coffee
出生日期：1989 年9 月21 日（19 歲）
身高：164cm
體重：98lbs
三圍：33 、23 、34
學歷：浸大傳理副學士
入行經過：三個月前入行做兼職模特兒，資歷是8 個Sing 之天使中最淺的一個，經朋友介紹下去無線試鏡做Sing 之天使，結果一擊即中。
演出經驗：08 年亞洲遊戲展、前LMF 阿肥新歌MV 。
「一直以嚟我都係一個冇自信嘅人，就算做咗模特兒都係一樣，不過依家有個咁好嘅機會，我希望會令自己有多啲自信，最重要係想搵多啲錢。自問唔係身材最好、樣最標青嘅一個，不過勝在各方面都好平均，跳舞時柔軟度最高，又多嘢講，希望能夠做好呢份工啦！」
身為歌手嘅菠蘿郭穎橋當眾自彈自唱獻技，實行走才女路線。
菠蘿 樂壇新人
姓名：郭穎橋
出生日期：1985 年6 月3 日（23 歲）
身高：170cm
體重：110lbs
三圍：32 、24 、33
學歷：中學畢業
入行經過：曾於幕後唱Demo ，繼而簽約Boxing Music ，將於09 年正式出道成為樂壇女新人。
演出經驗：Princess 家庭電器用品廣告、恒生銀行及可口可樂電視廣告等。
「我希望09 年出道前吸收更多經驗，識多啲人，為正式出道做好心理準備。講身材雖然我唔係最突出嘅一個，甚至可以話係最平胸嘅一個，不過我勝在身形夠平均、合比例，同埋唱歌係我強項，希望能夠殺出新血路。」
檸檬 搞笑空姐
姓名：李婷Liddy
出生日期：1987 年11 月6 日（21 歲）
身高：165cm
體重：99lbs
三圍：32 、24 、33
學歷：F.6 畢業
入行經過：F.6 畢業後在香港航空當了一年多短程線空姐，後經朋友介紹到Icon 模特兒公司任模特兒，經模特兒公司推薦面試《耳分高下》成為Sing 之大使。
演出經驗：陳柏宇MV 《理智與感情》、迪士尼廣告、花王髮型用品廣告等等。
「今次係抱住試下嘅心態嚟做Sing 之天使，所以冇諗住有咩目標，如果可以繼續做演員當然好，我會俾自己幾年時間，到25 歲如果冇咩成績就會轉行。講身材又唔輪到我，我覺得我可以走搞笑路線，就算要我扮醜女都冇問題，反而唔想俾人覺得我造作。」
自言做醜女都唔介意嘅Liddy 喺第一集《耳分高下》將會扮12 生肖，當送俾哈林嘅禮物，其實咁靚女，唔使做醜女都出到位啦！
Victoria 憑住甜美嘅笑容同美白嘅皮膚，為不少護膚品牌擔任模特兒。
布冧 搵錢至上
姓名：徐詩敏Victoria
出生日期：1988 年10 月27 日（20 歲）
身高：174cm
體重：113lbs
三圍：33 、24 、34
學歷：酒店管理副學士
入行經過：17 歲時朋友介紹拍了第一個廣告，繼而入行做兼職模特兒，畢業後轉做全職模特兒。
演出經驗：政府宣傳短片、Roxy 香水宣傳catwalk show 及Sony 廣告。
「我都係想搵多啲錢，儲多啲幕前經驗，雖然做完《耳分高下》之後未必會繼續做幕前工作，不過我會繼續做model 。我係8 個女仔中最慢熱嘅一個，亦都唔係太清楚自己有咩可以上位，但我自問皮膚好，笑得夠甜，希望能夠有多啲人留意我啦！」
學歷最高的水蜜桃，除了讀書叻之外，仲識得彈結他。
水蜜桃 中大校花
姓名：陳艾壎
出生日期：1983 年5 月3 日（25 歲）
身高：165cm
體重：110lbs
三圍：32 、25 、35
學歷：中文大學心理學系三年級
入行經過：6 年前經朋友介紹在Jamcast 任兼職模特兒後再轉到Starzpeople 。曾為《四葉草之盛裝舞步愛作戰》面試失敗，今次面試《耳分高下》終於成功。
演出經驗：鄧健泓《十年後的你》MV
「為咗做Sing 之天使，我今年暫時休學，大學畢業後先會考慮入行定係繼續升學，今次只係希望見識一下，嗱多啲人生經驗，抱住好輕鬆嘅心情嚟做，冇諗過做完呢個節目之後會點。我唔介意自己唔係焦點，所以都冇諗過點先可以出位。」
