新年
埋咁多利是，你點都會身痕想買啲gadget 玩吓掛。趁住呢個購物高峰期，電機兒梗要再次提吓大家，場入面黑店臨立，一唔小心實會被呃！
我同班奸商賤友打交道咗咁多年，熟晒佢哋啲坤人手法，所以今期一於親著一本《九陰真經》，踢爆佢哋嘅9 大陰人絕招，等大家有得提防。
中招指數100 ％
第1 招 鬼機還魂
不死嘅9 大陰招之首，將壞機零件拆出再加A 殼「百鳥歸巢」，或將二手機重新美化包裝，就當成全新機去賣。由以前最多係翻新舊款手機，到上年iPhone 2G 變成重災區，再到而家全港所有改到嘅PSP 2000 都係鬼機，呢招一直係全港黑店最穩定啲收入來源。
中招地點：先達、鴨寮街、各商場game 鋪
拆招方法：唔好貪平同貪玩老翻，去大型連鎖店買新款機，先包保係全新機。
而家改到機嘅v3.95 PSP 2000 畀人炒到貴一貴，但其實係鬼機嚟，唔好買。
中招指數50 ％
第2 招 水貨當行
黑店響推銷期間，巧妙利用言詞將水貨當成行貨賣畀你，從而賺多你一筆，場中術語稱為「老當」。以前最多係賣手機時用呢招，但近年港客醒咗，識得分行水包裝有咩唔同，所以呢招而家變咗賣DC 、影音產品同電器嘅常用陰招，因為嗰啲包裝同保用證較少人識分。
中招地點：商場或上樓嘅DC 及影音店、街鋪電器店
拆招方法：畀錢前打去各代理問清楚行貨嘅包裝、配件同保用證係點樣。
黑店絕到可以翻印一張保用證去呃人，呢樣要問番代理先分到真假。
中招指數30 ％
第3 招 抽件大法
買手機同DSLR 最易中呢招，配件愈多嘅機款，中招機會愈高。事前將啲值錢嘅配件抽起，好似電池、handsfree 或者相機帶咁，再用自己嘅包裝包番靚佢，賣機時游說你買番，即係變相令你買貴機。你唔買咩？黑店可將配件當零售貨品賣畀第二個，一樣無本生利。
中招地點：先達、鴨寮街、遊客區同上樓DC 店
拆招方法：買機時拎張說明書出嚟，將上面寫有嘅配件，逐樣check 吓盒入面有冇。
Samsung 行貨手機必送兩舊電，若得一舊，就實係俾黑店抽起咗。
中招指數100 ％
第4 招 A 貨亂真
有大陸做後盾，香港乜鬼A 貨都有得賣，最難分辨嘅係耳筒、手機handsfree 同記憶咭，全部成本價只係真貨嘅1 、2 成，黑店真係好好賺。最誇張嘅例子係你而家去game 鋪買PSP ，跟機同綑買嘅MS Duo 一定係A 貨！
中招地點：先達、鴨寮街、各商場game 鋪、腦場
拆招方法：都係嗰句，唔好貪平，幫襯大型連鎖店。
鴨寮街好多有晒仿原廠包裝嘅手機配件賣，但其實全部係A 貨嚟。
中招指數40 ％
第5 招 低價引客
櫥窗上貨品標到極低價（飛機價），引啲人入鋪頭問。到sales 推銷時，就狂踩你想買嗰件X 貨，再游說你買Y 貨。你可能從未check 過Y 貨個價，sales 會話特價賣畀你，但比其他鋪頭貴。
中招地點：先達、鴨寮街、上樓DC 及影音店
拆招方法：決定咗買咩先好行動，sales 講乜都唔好理，堅持自己嘅選擇。
好多時先達手機鋪門口標嘅，都係比真正賣價平好多嘅飛機價。
中招指數20 ％
第6 招 聯線做價
假設某貨本身只值$2,000 ，但響同類店鋪聚集嘅商場，一個老細可能開咗4 間鋪，跟住指使A 、B 、C 鋪將某貨賣到$2,500 ，剩番D 鋪就賣$2,300 。當有客響同場格完價，以為D 鋪真係賣得平而幫襯，其實做咗羊牯。
中招地點：先達、鴨寮街、上樓DC 及影音店、腦場
拆招方法：事前做足功課，清楚晒想買件貨值幾錢先好去買。
http:// 推介格價網站
www.price.com.hk，勁多貨品有齊行水價格，做功課必上。
中招指數10 ％
第7 招 焗買貨辦
先用飛機價引人，但只畀件陳列品客人試，個客決定買後，sales 就話去貨倉嗱部新機畀佢，不過規矩要畀晒錢出單先。但sales 返嚟實話部機冇貨，張單又寫明冇得退錢，一係硬屈你買件陳列品，一係要你轉買其他貴貨。
中招地點：遊客區DC 鋪、上樓DC 及影音店
拆招方法：響咩情況下買嘢都要一手交錢一手交貨。
街鋪黑店啲陳列品擺耐咗，就會用賤招屈客買，以減低損失。
中招指數5 ％
第8 招 貨不對單
類似海味鋪嘅呃人手法，通常用於電腦砌機之上。Sales 幫個客落單時，講好用勁組件，然後開出貴價，但師傅響工場砌機時，就用晒次一級嘅組件，例如較少cache 嘅HDD 或渣display 咭，部機一樣可以運作，只係效能冇咁勁，一般人又唔會識check ，好易中招。
中招地點：腦場砌機鋪
拆招方法：帶識電腦嘅朋友去幫手check 機，冇就買廠機算數。
萬一去咗電腦黑店，張報價紙寫用乜貴料，可能同部機砌出嚟係兩回事。
中招指數5 ％
第9 招 整機屈錢
買咗水貨，到部機有事要維修時，都可能會俾人鑿一筆。好似買機時明明話有保養，點知響保養期內壞機，都屈你要逐件零件計錢先肯整。更毒嘅係當你部機只有小毛病，整機黑店就專登整到部機更加壞，令你要畀勁貴嘅零件費整機。
中招地點：各商場水貨鋪嘅聯營維修中心
拆招方法：睇清楚張單寫包零件先好買，整機前仲要影底部機狀況，方便拗數。
只要
走一條線，DC 嘅LCD 芒即會冇嘢睇，黑店就可以叫你畀錢換咗佢。
帶齊證據去報警
電機兒平日仲見唔少客人買完嘢發現中招後，走返去鋪頭拗數，但黑店點會咁順攤退貨或賠錢畀客，一拗唔掂，呢啲case 個客多數都會火遮眼立即報警。不過由於當時個客冇證冇據，差佬嚟咗通常都做唔到啲乜，只會落簿備案了事。所以你買機後一定要保留所有單據，真係唔好彩中招又肯定店方有訛騙成分嘅話，就帶齊證據去警局報案。或者亦可向消費者委員會求助，佢哋會畀意見同教你點做，例如去小額錢債審裁處向間鋪索償。
電機兒成日都見到先達有人因俾鋪頭呃而報警，但差佬即時有行動拉人嘅case 少之又少。
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
