鄭健樂（左一）、梁烈唯（右一）
週四（22 日）《鹿鼎記》響電視城西餐廳做首次宣傳，場地慳皮仲要得飾演阿珂的應采兒單拖，無線惟有臨時叫四個男奀星做A 貨小桂子頂檔，成件事即時削晒。
無線播緊嘅大陸劇《鹿鼎記》韋小寶七個老婆佔咗六個係內地奀星，不過有黃曉明演韋小寶撐住，上週最高收視仍有30 點，反而無線自家大製作《珠光寶氣》就聲勢大口碑差。
據知無線本想請明哥來港做宣傳落多兩劑藥谷行收視，可惜對方要求多多，先要5 張頭等機票再加五星級食住，即時嚇窒凡事要節流的無線，焗打退堂鼓。海嘯咁大浪，明哥仲可以企到咁硬淨，擺明玩嘢啫！
今年31 歲的國產靚仔小生黃曉明擔大旗演《鹿鼎記》韋小寶，贏晒口碑同收視，不過播出近大半個月，黃曉明同其餘6 位老婆始終未見真身宣傳。
其實無線於《鹿》劇首播前一星期，已經聯絡黃來港幫手做宣傳，但走紅後的黃曉明提出條件卻嚇怕無線，知情者說：「其實TVB 聖誕前同黃曉明聯絡過，佢竟然要求5 張北京飛香港嘅來回頭等機票，畀自己同助手等人，又要住五星級酒店套房加開飯費用，條數計落成10 萬銀，無線要節流梗係縮啦！」
請黃曉明使10 萬：
機票：國泰頭等機票$6,949 ×5 人=$34,745
酒店：都會海逸酒店（黃曉明以往來港入住的酒店）$3,900 ×3 間房×5 晚=$58,500
食用及其他支出約：$3,000 ×5 日=$15,000
總支出：$108,245
貴過長今
05 年韓劇《大長今》收視高達50 點，成為無線史上外購劇之冠，當時李英愛來港出席宣傳，TVB 亦只係畀佢同經理人（箭嘴）兩張商務機票。
扮撞期
黃曉明自稱冇期故推掉17 日的《華姐》表演，但查實他所講的只是跟內地一姐李宇春一齊出場的湖南衛視，於20 日舉行的春晚活動，跟《華姐》沒有撞期。
咁易請得郁我咩！（設計對白）
其實《鹿鼎記》已分別於去年5 月及6 月於內地和台灣播放，香港守尾門，市場價值又最低，難怪黃曉明咁唔畀面嘅！
網上圖片
李菲
韋小寶收埋曾柔
飾演曾柔嘅李菲（左一）成功冧掂黃曉明，據內地記者爆料：「拍完《鹿鼎記》，他們就拍拖啦，還有說二人同居，內地很多記者都知道，不過始終查不到同居地址在那里吧！」之後李菲就開始停拍劇過退隱生活，黃曉明私家菜收埋食。
講真李菲（左一）樣子一般，但拍《鹿》劇5 個月成功冧掂黃曉明（右一），早前就被內地傳媒影到夜會，不過黃曉明例牌死口唔認：「因為要談〈什麼都可以〉MV 的工作才見面。」
雖然來港宣傳使錢多，不過據知無線都未放棄，再建議黃曉明在早前17 日晚於佛山舉行嘅《國際中華小姐》做嘉賓補飛，但黃曉明一樣唔畀面，知情者說：「TVB 諗住響內地使費會慳好多，點知黃曉明又話冇期拒絕！一拖再拖，最後只係請得郁應采兒頂住檔先囉！」
大茄頂檔
週四（22 日）無線於電視城西餐廳為《鹿鼎記》宣傳時，果然只得阿珂應采兒再加「唔啦更」的司徒瑞祈，黃長發等變臨記扮韋小寶頂檔。好拍檔放飛機，應采兒仍然幫口：「之前《鹿鼎記》響內地同台灣宣傳，我哋全部演員一齊出席，氣氛好好，而家冇黃曉明，梗係失色好多啦，不過我諗都唔關多要求事嘅，佢應該係度唔到期啫！」
而無線外事部助理總監曾醒明就解釋：「佢係要求2 張商務機票同2 張經濟位機票啫，不過後來佢都話冇期，我哋係打算請佢做《華姐》嘉賓，但係佢話同內地春節晚會撞期，所以出席唔到啫！」係喎，黃曉明家陣貴為內地紅小生，香港市場蚊咁細，又真係好難請得郁佢喎！
1st 李連杰 2.4 億
2nd 張國立 3,110 萬
3rd 趙本山 2,000 萬
4th 葛優 1,300 萬
5th 胡軍 1,220 萬
6th 黃曉明 1,200 萬
去年狂搵1,200 萬人仔
黃曉明近年歌影視撈齊，中港台狂掘金，據08 年福布斯中國名人榜中，黃曉明勁賺1,200 萬人仔，全中國男演員排第6 ，只係輸畀功夫影帝李連杰。後生小生中成績最好，搵咁多，5 張頭等機票自己科水都好濕碎啫。
《蘋果日報》圖片
做埋歌星
07 年時黃曉明亦曾出過唱片，今年1 月更嗱咗北京流行音樂典禮中的「全能藝人獎」，響台上仲城城上身咁又唱又跳〈My Girl 〉，歌技係點？Who cares ！人紅先最重要。
公主生擒金牌男
響《鹿鼎記》中以勁性感兼有大量虐玩場面嘅建寧公主最搶鏡，不過飾演建寧嘅內地演員舒暢可以執到支好籤，只因俾《鹿》劇名監製張紀中睇中，佢02 年已經幫張大導演《天龍八部》嘅天山童姥，雖然舒暢今年只得21 歲，但張大導讚到出口話：「我一想到建寧公主這角色，就馬上想起舒暢，劇中刁蠻帶點搞笑的公主角色，舒暢演得很到位。」
除冧掂張大導，早前舒暢響自己blog 內爆冧國家金牌選手、吊環王子陳一冰，之後又響香港密會，張大導真係有眼光㗎！
有名導演張紀中睇住，冇咩人氣嘅舒暢一樣可以有重戲分，連啲衣著同劇照都搶鏡過人。
今週劇情講公主同韋小寶玩滴蠟，再被對方反擊，公主就high 晒咁欲拒還迎，劇情咁激，拜年都要𥄫實。
雖然陳一冰同舒暢二人否認撻著，但來港密會捉到正，冇得抵賴。《壹週刊》圖片
滴蠟勁搶
