人氣爆燈工作亦滿瀉嘅G.E.M.仲未得閒睇《崖上的波兒》，不過就自稱係宮崎駿擁躉，揸住波兒個招牌膠水桶扮波兒勁投入。
中年危機才子同玉女成婚已成事實，張茆亦回歸校園，「倪情日記」終於out 咗，全城至hit 話題由「波兒波兒波兒小寶貝」接棒。
籌備4 年，宮崎駿新作《崖上的波兒》上畫7 日（截至1 月23 日）票房爆近九百萬，未睇戲未撲飛唔識哼波兒主題曲？點同人溝通呀？
片中人魚波兒5 歲人仔就拍拖，扮金魚嘴扮到出晒名嘅樂壇波兒G.E.M.（鄧紫棋）就話一啲唔出奇，仲親身上陣惡搞波兒造型，自爆初熟puppy love ：「我4 歲就想結婚！」
免費文章
一日走三場，G.E.M.為扮波兒專程攝兩粒鐘畀《FACE 》，仲搵髮型師齊齊買假髮set 波兒頭。
08 新人王G.E.M.出道一年，除了17 歲巨肺所向披靡，招牌金魚嘴亦神似到出晒名，不嬲係宮崎駿粉絲嘅G.E.M.，一聽話要扮波兒，檔期排到密密麻麻，都為本刊抽空扮偶像筆下角色：「宮崎駿每套戲我都睇，最鍾意《千與千尋》個故仔，男主角呢，就最愛《哈爾移動城堡》入面個魔法師哈爾，仲成日發夢同佢拍拖睇星星添！不過呢排做嘢實在太忙，仲未睇《崖上的波兒》，但已經好鍾意首主題曲。」
G.E.M.話聽朋友講，波兒響海浪奔跑追宗介一幕超浪漫：「好想快啲睇呀！」
4 歲G.E.M.
17 歲巨肺G.E.M.超早熟，4 歲讀緊幼稚園就想同男同學結婚。
最愛男角
《哈爾移動城堡》男主角哈爾係G.E.M.夢中情人：「又靚仔又識魔法，好型呀！」
幼稚園第一次
人仔細細，17 歲G.E.M.的愛情經驗一啲唔嘢小，15 歲已同學界歌唱比賽師兄拍拖，最近又爆與「嶺南Eason 」行得密，G.E.M.今次仲自爆超早熟初戀。
「我第一次鍾意男仔係幼稚園中班，我仲記得佢叫李鍵林。有一次學校表演，老師編咗我同佢一pair 跳舞，仲要繑手添，好親熱！可能成日練舞對住啦，我就覺得佢好特別，表演前一日仲同媽咪講要同李鍵林結婚添！所以話，波兒5 歲拍拖唔出奇啦！呢啲咪緣分囉！」
學波兒女追男
波兒愛男主角宗介，由海底追男仔追上岸，仲放棄親人同魔法，勁主動。
「我小學4 年班就寫情信畀鍾意嘅男仔，仲以《倚天屠龍記》故仔為例，問佢響佢心目中邊個係趙敏、邊個係小昭，哈哈，結果佢答我係佢嘅趙敏，咁即係我對佢嚟講最重要啦！勁冧呀！不過後尾俾媽咪發現我儲埋呢啲信，雖然唔反對我咁主動，但係話我太細個囉！」
係囉，4 歲想嫁人，9 歲女追男，又真係早熟啲喎！
成龍霸王
呢首波兒霸王版歌詞抵死生鬼，如果港版有機會出碟，一定要有埋呢隻歌！
浸水欣宜
明明唔關事，但欣宜都要俾人笑一餐，真慘！
惡搞波兒
波兒熱爆，繼欣宜慘變「崖上的欣宜」後，連成龍大哥都被網友睇中，成為惡搞對象。近日YouTube 有一段將成龍賣生髮水廣告的對白套入波兒主題曲的短片，畫面同歌詞都異常配合，短短3 日的點擊率已高達30 幾萬！
http://hk.youtube.com/watch?v=67dA9lXunOE
呢個就係熱戀中嘅金魚嘴啦！（真實對白）
估佢唔到
比起宮崎駿舊作，《崖上的波兒》故事明顯淺白得多，口味兒童化。今次冇電腦特技，全部手繪動畫，雖然話講故唔好駁故，不過都有出人意表場口囉！
估父母
宗介響戲中成日嗌：「理沙，我要食雪糕！」或者「耕一打電話返嚟喇！」初時以為理沙同耕一係照顧佢嘅姐姐哥哥，點知原來係佢爹哋媽咪，唔通日本而家興直接叫父母個名咁西化？
陳琋桐10 歲：「宗介唔見咗媽咪嗰段好驚呀，好彩最後搵番咋！」
少爺占：「以我所知日本嘅小朋友如果同父母關係好親密，就會直接嗌佢哋個名，我記得《藉著雨點說愛你》都係咁㗎！」
估生死
電影中段講全村俾海水浸晒，宗介同波兒周圍都搵唔到媽咪理沙，後來發現理沙同老人院一班婆婆響水底，而原本要坐輪椅嘅婆婆竟然神奇地行得走得，唔知仲以為佢哋上咗天堂！
陳小姐18 歲：「我覺得卡通嚟啫，睇唔明咪當天馬行空囉，最緊要公仔靚！」
周柏豪：「我冇諗過佢哋係浸死晒呀！波兒父母都識魔法，佢哋只係將啲善良嘅人安頓好，所以先整個安全網保護宗介媽咪佢哋！」
我呢條金魚鍾意食芝士腸多啲！（真實對白）
日
港版主題曲唔出碟
《崖上的波兒》電影同名主題曲響電台勁播，日版由大橋望美唱hit 全日本，仲以9 歲之齡殺入《紅白》成最年輕演出者；港版由6 歲嘅何鎂沂主唱，曾經係香港兒童合唱團成員嘅鎂沂細細個已有音樂底，難怪佢話：「聽過日文版2 次已經記得晒啲旋律。」
日版細碟及電影原聲大碟一早響日本熱賣，可惜電影發行商透露：「因為版權問題，港版主題曲唔會響香港出碟。」冇得聽，自己唱啦波兒迷！
4 歲做童星嘅大橋望美曾演出靈異日劇《世界奇妙物語》，上年唱《崖上的波兒》主題曲紅爆日本，但因要專注學業，上年尾出席完紅白宣布引退。
港
就讀聖保羅男女小學嘅何鎂沂，曾演出舞台劇《小安妮》，鎂沂嘅夢想係學鋼琴將來做音樂治療師。
鍊贏畢彼特
1 月22 日單日票房由《崖上的波兒》領先（下表），上映6 日已經收近900 萬，僅次於《赤壁》，估唔到連梁朝偉同畢彼特，都要輸畀條魚仔！
神奇導演
68 歲宮崎駿出名天馬行空，真人亦有好多地方估佢唔到，日本電視台曾採訪佢創作《崖》片嘅過程，發現宮崎sir 每朝返工一開門即講：「早晨！」，但辦公室里明明人影都唔見隻，之後佢解釋：「呢度有人㗎，但你哋見唔到咋！」唔通宮崎sir 識通靈。
