希望喺38 歲前生三個仔女嘅林熙蕾，期望日後一邊拍戲一邊湊仔，講就天下無敵，剩番四年時間，生唔生得切都成問題。
林熙蕾同朱孝天嘅姊弟地下情，三年半以來不斷傳出婚訊。最新版本，疑似朱生朱太因為靜靜雞註冊無通知身邊好友，於是兩公婆「吹雞」搞日本之旅，美其名同班friend 集體瘋狂shopping ，實情係舉行驚喜wedding party 與眾同樂。
一代電眼美人，情歸面腫肚凸朱公子，唉！
唔認拍拖唔認同居，但朱孝天早排俾人發現頂住個大肚脯，抱住林熙蕾隻波士頓
去拍MV ，呢啲咪叫愛屋及烏囉。
美國註冊
朱孝天同林熙蕾05 年因為拍電影《東京審判》撻住，07 年更被發現同居市值七百萬港元嘅豪宅。明明影到著住睡衣企喺窗邊，兩個依然口硬唔認拍拖，過隔籬屋借豉油都唔會咁著啦。
拍拖三年有多，幾乎耐不耐就傳出婚訊，講到最似層層係07 年，傳朱孝天求婚成功後，為遷就身在美國嘅外父外母，於是同林熙蕾飛去美國註冊結婚。
由於同一時間，朱孝天自稱內分泌失調而暴肥，唔想俾人笑佢「豬笑天」，於是積極戒口兼學太極養生，加上林熙蕾又話睇緊中醫調理身子，外界憑住高度幻想力，認定兩個正為「播種」做好準備。
日本擺酒
至於最新版本，傳舊年9 月已經靜靜雞響台灣註冊結婚，兩個趁住1 月有假期，於是「借啲意」叫埋成班朋友一齊去東京旅行，其實兩公婆一早安排咗神秘wedding party ，將喜事公告天下。
據台灣小道消息話，因為1 月15 日係朱孝天30 歲生日，兩公婆提早喺11 號出發二人世界，之後約朋友17 號響東京見面，夜晚食飯慶祝新婚，一對新人會留喺東京度蜜月，分分鐘造埋人先返台灣。
有記者向林熙蕾老友、珠寶設計師趙心綺求證，佢話17 號的確會成班朋友飛去日本參加party ，但只係普通朋友聚會，同結婚冇關；至於新娘子另一位好姊妹舒淇就非常愕然：「Wow ！完全不知此事，我這幾天都在香港宣傳電影，沒有計劃去東京。」
已經34 歲，林熙蕾嘅女神地位早被後浪取代，早排佢唔介意賣肉谷胸做胸圍代言，可借無助銷情，品牌商最終搵當家花旦陳喬恩頂上。論年紀論cup 數，林小姐應該輸得心服口服。
07 年7 月
同居七百萬港元豪宅，原本無乜人知，因為兩個八卦一齊望落街，俾人影到著情侶睡衣斷正，不過依然唔認同居喎，吹咩！
朱生朱太拍《東京審判》撻住，家陣度蜜月都揀去東京，又會咁啱嘅。林熙蕾身旁係演員之一嘅謝君豪和曾江。
出碟宣傳
對於上述「指控」，林熙蕾笑笑口話：「這個問題很無聊。」不過就承認自己身在東京，17 日的確約咗人食飯：「是誰說我在台北公證（註冊）結婚？你們（指記者）要去查出證據來，以你們對我的了解，我要公證應該回美國，也不是台北吧！在東京只是好朋友相約吃飯，不是喜宴。」
新婚傳聞滿天飛，但同一時間，亦有傳林熙蕾為咗幫男朋友新碟做宣傳，諗條屎橋出嚟，霸佔娛樂版頭條。
如果係真，的確皇天不負有心人，朱孝天嘅《Getting Real 》新歌加精選，出街一個星期話咁快就打入g-music 零售銷售榜第二位，僅僅輸俾被傳買榜呃冠軍嘅小豬羅志祥。
逐步浮面
無論有情人有冇終成眷屬，朱孝天同林熙蕾嘅感情的確相當穩定，早排男方做訪問時，就有意無意半公開戀情。
「我不是不敢、不願意（公開戀情），是不想扼殺某些人的感覺，很多事太赤裸就沒那麼好玩，但總是要為女生住想，因為女生的價值和男生不一樣。」
大話連篇原來為咗另一半，如果女方想公開又點？「我OK 。只是去年傳我們結婚，今年傳訂婚，明年要傳什麼？那你就去看報導，報導還比較精彩，我講實話出來，大家就沒有興趣。」
至於林熙蕾，雖然美國長大但思想傳統：「婚姻是一輩子的責任，如果能在38 歲前生三個小孩最好，但我絕不可能未婚生子，我擇偶條件要對方善良、真誠、誠實、會做菜、不用我養、比我高。」朱孝天唔知中幾多樣？
