汪明荃（阿姐）、薛家燕、關菊英、曾華倩、湯盈盈、陳豪、林峯、黃宗澤同黎耀祥等，噚日喺奧海城出席「發動香港力量」活動，齊齊為香港人打氣。由於阿姐唔舒服，所以只係上一上台就走咗，不過都算唔話得咋。講到今年香港經濟，一班藝員都抱樂觀態度，家燕姐仲話雖然股市上損失唔少，但都預咗$118,000派利是，仲講明利是絕對唔會縮水，佢話：「大家新年唔使就住，我就唔會縮水，等大家可以開開心心。」
鍾嘉欣同林峯呢對緋聞情侶，異口同聲都話願意減薪接job 。
關菊英（左）同曾華倩嗱住個大揮春，祝大家牛年行好運。
陳豪一早減價
幾位小生花旦都話過完年經濟應該比較差，所以佢哋都願意減價接工作，鍾嘉欣話如果公司許可半價都得，佢話：「我上年都好好彩有賺錢，如果公司畀嘅話，五折都冇問題。」林峯都覺得有需要嘅話都會減價，但佢強調「無線人」物有所值，佢話：「如果我價錢減咗，工作數量會增加嘅話，我都肯七折。」陳豪就話一早減咗價面對經濟問題，佢話：「大家都係想尋求一個合作關係，我之前已經減咗，希望可以一齊度過。」
無線大批藝員出動為全港市民打氣共度難關。from
http://appledaily.atnext. ... art_id=12114433
