筆者入行10 年，去咗9 年Tokyo Auto Salon ，但從未見過有今年咁嘅情況，以前霸最多攤位嘅HKS 、TRUST 、Veliside 等幾間超大型改裝商唔參展、展場有成條街咁長嘅空置攤位、平時多人到爆嘅racing girl 同水喺寫真counter 水盡鵝飛、大部分racing girl 變咗racing auntie ……筆者入到場直頭要搣咗自己塊面幾下先信眼前景象係真！金融海嘯，認真慘無人道……
之但係9 年來筆者見盡日本改裝文化轉變，由死改爛改NA 飛仔車，到一窩蜂改turbo 甩尾車，再到近年喪玩MPV 大包圍，潮流點變嘅改裝商都死唔去，每年都有主題同主角車撐場，每年一樣咁精采！雖然今年場面前所未有咁冷清，但亦代表留得低嘅都係有實力好嘢，最重要係好明確咁指出咗喺未來經濟困境之下，應該點玩車！因為今年場中最多人改嘅除咗GT-R R35 同新Fairlady Z34 呢啲跑車之外，10 個有規模攤位之中，竟然有8 個擺咗部cheap 爆慳車Toyota iQ 喺度，咁你應該知嚟緊幾年㗎仔會主力玩咩車啦！
成街吉位
東京改裝車展單位一向迫爆，呢個HKS 同Veliside 租開嘅西館Hall 1 就竟然空咗成條街出嚟。
DJ 冇癮
一向「印」足全日嘅DJ 完全冇途人欣賞，悶到冇晒feel ，求其播碟就算，hea 爆！
餐廳靜坐
平時多人到連地下都要爭位坐嘅food court ，家吓少人到離奇，靜到可以當圖書館坐低睇小說。
阿嬸皺皮
Racing girl 水準每況愈下，唔只樣衰，仲要愈嚟愈老，愈肥愈皺皮。你睇呢位「老友記」，sexy 到墜晒皮，不如返屋企湊孫啦！
攤位公園
除咗多咗條大馬路之外，會場中不時發現吉鋪，變咗公園咁放嘅椅畀人休息吓，做吓體操咁。
風瀟瀟兮冷清清
最新電鍍潮
VERBAL 改裝的iQ 外形玩得仲潮過阿葛，全電鍍車身再撞全雪白內籠，全車豐田章拆晒，只剩品牌貼紙，相信藤原浩都會話佢改得潮！
反常改turbo
改裝從來都係捉心理，冇錢焗住降grade 玩慳車，一有少少錢就實身痕要改裝，所以Blitz 就火速開發晒專用胎軨、避震、死氣喉出嚟，更癲到有1.0 公升慳油引擎專用turbo kit ，完全違反iQ 開發概念！不過咁先係日本改裝好玩之處。
全場熱玩改iQ
冇錢玩咩車好？梗係愈平愈好啦！不過㗎仔慣咗嘅車一舊就換新車，唔會好似陀地咁窮玩N 手車，所以
人必買慳油平車，推出兩個月嘅Toyota iQ 車價平、夠慳油、仲要潮味濃，今年喺車展嘅風頭直頭壓下同期推出嘅Nissan 旗艦跑Fairlady Z34 ！Toyota 攤位已經有N 咁多架不同牌子嘅改裝版，連大廠Blitz 同Endless 都要改埋一份，仲要擺正喺GT-R 隔籬當眼位，地位超崇高！
精改Top 5
少參展商唔代表冇嘢睇，呢個時勢仲夠薑使錢擺車展嘅，梗有必殺激改武器在手。今年最多人Hard-tune 嘅就有以下5 大車款，就每個車款精選幾部嚇鬼新改法代表show 過你睇有幾特別！
呢部BRANEW 好似受咗輻射咁爆晒肌肉，車尾仲要用中出三尾喉。
Power R35 外形得套招牌拉花勁普通，點估到佢引擎艙竟然會整多對凸起晒嘅supercharger 上去，同換晒鋼pipe 有成600 匹咁勁㗎！
No.1 ︰孖叉戰神Power GT-R R35
冇得傾，新戰神R35 晉身supercar 行列，前所未有咁受全球車迷歡迎，梗係間間㗎仔廠都改，成為全場最多的改裝demo car 。不過咁多間大廠改咗成年來來去去都係改電腦、死氣喉勁冇新意，講改得最突破嘅只有增壓專家Power ，因為今年佢哋前所未有咁將R35 副原裝已經用孖turbo 嘅VR38DETT V6 偈，再改多套Rotrex C30-94 Twin Supercharge Kit 落去，好似Golf GT 咁玩孖叉雙增壓，閒閒哋有600 匹！不過廠方話而家只係起步階段，set 好晒最少仲有100 匹以上嘅馬力增長。另外，一路只有頭唇尾翼改嘅R35 ，今年亦終於有癲喪大包圍，BRANEW 套頭尾泵把有成三排大窿嘅包圍款真係全場最激，最抵死係佢連死氣喉都改埋中出三喉嘴設計襯番嘅窿嘛！
Mine's Z34 現時改裝最多，由電腦至吸排氣，再到避震都有齊，輕輕加碳纖頭唇及泵把入風口已經超型。
ZeleZ34 都係好似R35 咁玩鮮橙色，但碳纖包圍未夠多，而且頭泵把款改到好似上代咁樣，雖然已有FZ-Rom 電腦同頂bar 等部品，都未夠Mine's 吸引。
老牌ARC 今年亦都好快開發出Z34 嘅鋁合金風箱、生氣批、中至尾喉同油冷器，不過因為主力造吸排氣部品，唔算改得好全面。
No.2 ︰速改新女Mine's Fairlady Z34
日本最新最勁嘅跑車肯定係12 月先推出嘅新一代Nissan Fairlady Z34 ，雖然唔夠GT-R 勁，但夠平民化，所以成為今年第2 多人改嘅戰車。其中最勁嘅就係早排已經落過筑波賽道試飛嘅Mine's Z34 ，同之前改R35 一樣都係纖維頭唇加尾翼，再換VX-Rom 電腦同頭批、中至尾喉，已經迫近400 匹。另外憑R35 喺美國SEMA 車展嗱獎嘅Zele 同ARC 亦火速為Z34 開發出改裝部品，不過parts 暫時就未夠Mine's 咁多。
引擎艙
實晒，淨係show 副偈同
supercharger 出嚟！
No.3 ︰突破自然Mugen 24 sc Concept
比Z34 低幾班嘅新款辣車，就有Honda 推出3 個月嘅第8 代Accord ，總算唔使一味谷Type R 改裝，今年更加成為Mugen 嘅主力改裝車，因為佢哋今年重點改Accord 副K24A 型2.4 公升i-VTEC 引擎，仲開發咗架Mugen 24SC Concept 出嚟。不過今次改法就好突破，唔再一味用自然吸氣方式改裝谷高轉，反而好似之前改Jazz 咁加supercharge ，再配合6 速棍波，馬力有成350 匹，香港MK 系Honda 迷實流晒口水！
4B11 專用actuator 可以將bar 數穩定地提高，用盡原裝turbo 。
No.4 ︰慳改露筍Blitz Evo.X
今年Evo.X 都仍然係各大改裝商主力demo car ，反而WRX STi 就比上年少咗好多。但多Evo.X 改裝車並唔代表改得激，其實同上年差唔多都係改基本嘢，冇咗HKS 同TRUST 參展，Blitz 已經係parts 最齊嗰個，除碳纖風箱同中至尾喉、Intercooler 同專用放氣valve 之外，仲有專為4B11 引擎開發嘅turbo actuator ，唔使換turbo 都可以催谷馬力，而且表現更加穩定，喺經濟環境唔好時可以幫車主慳番改turbo 嘅錢。
個籠改晒LCD mon 音響同新款冷氣控制，連軚盤都係現行Type R 款。
No.5 ︰翻生激玩Mugen NSX RR Concept
之前Spoon 無端端激改部停咗產嘅「日本法拉利」NSX 嚟鬥澳門，大家都拗晒頭，不過今次車展就可以證實到㗎仔會好似AE86 咁玩番起NSX
！因為除Spoon 展出咗全新街道用NSX parts 外，連Mugen 都大改NSX ，仲要做主角車！呢部Mugen NSX RR Concept 最搶眼嘅係一套全碳織Super GT 賽車大包圍，副3.2 公升V6 引擎更加好似賽車咁落晒碳纖風箱，而且包埋racing 紅籠同換咗新款Honda 軚盤，搞到部嘢好似新車launch 咁！雖然唔係新車，亦唔係好多demo car 在場，都唔介紹唔得！
潮爆補品
改竦咗部車，當然要嘅補品令部車更型啦！以下就係筆者在是屆搜刮到新parts 。
Bride 鱷魚皮
今年兩大跑車椅公司Bride 同Recaro 各走唔同路線，Bride 走performance 同型格路線，出咗個Analogue 椅背調校系統，仲有張超型鱷魚黑皮桶凳，潮到爆炸！
Recaro 包BB
Recaro 就走高格調路線，推出手功精細嘅車花桶凳之餘，仲有全新Start R BB 座位系列，特別之處係可為嘅跑車度身訂做BB 凳，手工仲靚過原裝大班椅。
Rays 多色軨
Rays 今年冇乜新款軨，推出嘅就只係VR.Debut 系列，特點係多色揀！
Project μ7 色鮑
Project μ今年最新發布嘅產品就係七彩迫力卡鉗，用嚟同VR.Debut 軨玩撞色一流！
創意Cutie Car
東京改裝車展除咗有一大堆現實激改戰車，仲有數唔晒咁多超現實古怪cutie 改裝車。呢啲參展商唔係汽車設計學校show 學生作品，就係租得一個車位擺手作改裝嘅蚊型改裝公司，所以唔太受經濟環境影響，今年繼續有搞笑嘢睇！
Piiyo 其實仲有三座位版本，不過呢架Super DX 後座就改咗做貨斗。
睇落似貨車，但一開門竟然見到仲係用緊電單車手把控制！
三個轆斗
呢部Piiyo Super DX 誇張到將部2 個轆激改，成個pick up 車殼笠上去，之後加多個尾轆變3 輪車，更搞笑嘅係車籠入面仲依然用番個電單車手把當軚盤用，引擎就改咗副50c.c.細偈落去，車籠入面更放咗勁多粉紅色
女毛毛墊，車身又用埋米白色dual-tone ，揸住佢出街溝女仲勁過你揸拉利。
環保金剛
雖然意念係來自《變形金剛》，不過唔好以為佢真係會變機械人，只係想講佢其實係部Pajero iO ，最正嘅係車側嘅直立式死氣喉同埋個油缸，係用屋企嘅垃圾筒同鐵桶改裝而成，廢物利用，夠晒環保。
閃石圓形
呢兩年勁興玩閃石，不過香港大部分只係貼吓車章同牌框，唔敢好似鬼佬咁貼晒成車。但係想特別又唔想太揚，亦都可以學呢架Honda K-Car 仔Life ，粉色車身貼晒彩色閃石畫圖案，連頭燈、鬼面罩同軨都加上一點點閃石裝飾，即時成部車得意晒，而且唔使用咁多閃石都一樣bling ！
車頭仲學埋smart 改到個頭
向前推開再拆走。
爆音福祉
唔通真係改到冇嘢好玩？K-Car 都要拆空個尾箱同後座擺輪椅變殘障褔祉車？不過全場都冇人咁改褔祉車，呢部嘢勝在夠特別！尤其係隻尾門可以變上落斜台，而且張電鍍輪椅真係超型，不過成個尾箱都係喇叭，坐咗入去可能會變埋失聰㗎！
扮勁Roadster
㗎仔一向虛榮，迷戀名牌程度仲勁過港女，所以玩外形改裝好多時都係以模仿名牌貴車為目標，而最易最平扮到supercar 嘅就非陳年易手日本roadster 莫屬，而且今年仲特別多，Cappuccino 同MX5 齊齊變Porsche 、Lotus ！
車頭車尾都非常之傳神，唯一破綻係雙座位開篷設計。
冒水戰神
一部來自NATS 汽車學院學生嘅作品GT-K ，外形同新款GT-R 有9 成相似，不過一行近就發覺size 細咗好多，原來係由一部Suzuki Cappuccino 改裝而成！不過要買齊原裝GT-R 頭尾燈同泵把改位，就應該可以買起10 部陳年Cappuccino
！
車尾原本好靚，點知咁大轆喉隊咗出嚟，影衰晒部車。
雙座蛇仔
一部MX5 ，你點諗都諗唔到可以將個車頭變到部美國肌肉王AC Cobra 咁樣，仲有尾燈同車尾箱嘅間格、造型都似到十足十，簡直係鬼斧神功。
迷你波子
另一部非常神奇嘅MX5 ，唔只有保時捷911 嘅外表，仲送多一對鷗翼門過你，不過車尾就無Cobra 咁Detail ，方方角角，成部紙
車咁，
晒！
增肥蓮花
記得上年有部8 仔激改變瑪莎QP ，今年就有呢部5 仔變Elise ，不過因為MX5 肥仔好多，又唔係中置引擎，夾硬喺尾沙板加個入風口，都係扮得唔夠神似，不過出街可能仲多人睇過Elise 。
爆音Never Die
前幾年東京車展嘅爆音改裝都俾DUB 搶晒風頭，今年就可能因為經濟唔好嘅問題而缺席，所以就得番日本土炮爆音黨獨撐大旗，想睇靚嘢就真係少嘅，不過騎呢嘢仍然大把。
無論開車門或者尾門，都只係見到喇叭同mon ，真誇張！
迫爆喇叭
一部細到咁嘅MR Wagon K-Car 仔，外面就扮晒大隻加包圍，後座至尾箱就全部塞滿音響同mon ，全車數數埋埋都放咗十幾個喇叭、二十幾個mon ，偷位偷到連軚盤都要換埋透明膠片，會唔會俾喇叭震碎㗎？
全車都係漫畫少女花，真係咁以自已係癡漢為榮？
可能係睇慣卡通關係，搞到座位都好有高達feel 。
動漫列車
講真，其實場內大部分MPV 改裝都係嗰幾味，拆走幾張椅，變做流動影院咁。但呢部Previa 就唔同，一嚟車身拉晒癡漢最愛嘅動漫少女花；入到車廂，原來改到後排座位成個Cockpit 咁，畀喇叭包圍，而且又近座位，睇戲嘅聲應該真係好surround 。
層層疊Amp
呢部凌志Soarar 係今年Option 改裝比賽嘅得獎展品，其實唔只音響，鷗翼門、電鍍引擎等，基本上所有show car 要有嘅元素佢都有齊，不過最靚都係個尾廂用透明膠間咗好多層出嚟擺擴音機，連兩邊粗碌尾
支架里面竟然都可以放埋擴音機！
最鍾意係車尾堆擴音機兩邊擺咗兩個Gucci 戒指盒做裝飾，睇落又幾grand 喎！
科幻聲效
日本音響改裝大廠之一嘅Fuel Bank 今年除咗有拿手好戲MPV 流動影院之外，另外展出咗一部RX-7 ，呢部嘢車廂細細，畀Fuel Bank 裝到連車門、車頂都成排mon ，尾箱間隔又尖又鋒利，睇落勁cyber ，聽落亦唔係以爆音為主，偏向玩靚聲多嘅。
呢條電車男，嗱住個lolita 毛公仔周圍搵女合照，仲叫我幫佢揸機，唔執佢一劑已經覺得自己高EQ ！
嘩！真人版稻中兵團操兵呀！
男人老狗喺住G-String 、玩cosplay ，仲要整張咁姣嘅咭片宣傳自己車房，係咪覺得自已好索先？
過激癡漢
唔知係咪經濟差、工作壓力大嘅關係，車展入面好似愈嚟愈多癡漢出現，以前都只係影相zoom 吓人個胸、炒吓人裙底，但今年竟然癲到玩cosplay 通場走！見到簡直想嘔！就影幾件畀大家開吓眼界。
後記：我已盡最大努力……
去Auto Salon 影㗎妹，係作為汽車雜誌記者嘅天職，可惜今年實在太無奈！Show girl 少不特止，就算有，超過50%都係火雞姐咁嘅樣；5%好樣嘅嘅，就已經影咗好幾年，差唔多連佢都認得我咁滯。對於男姓讀者，筆者今年自認失職，但我已經盡咗最大努力刮咗左邊幾件入得吓眼嘅返嚟，同埋，喺場中我對眼已經受到應得嘅懲罰喇！
