亞軍陳倩揚整晚表現都算淡定，連埋早一日奪得嘅友誼小姐，總共嗱咗31 萬獎金連獎品走人，佢最多謝嗰個應該係詐病爛玩唔參賽嘅港姐冠軍張舒雅。
《2009 國際中華小姐競選》上星期六（17 日）選完，香港代表陳倩揚僅僅輸個馬鼻畀大熱苟芸慧（多倫多）代表得亞軍，算有交代。
陳倩揚有好成績，據知原來無線刻意於決賽當晚，編排陳倩揚與質素較差的佳麗編成一組，其一避免同大熱索女人比人比下去；二來令陳倩揚在扒女組標青跑出。
無線明畀個筍位陳倩揚企，不過富家女張舒雅應該唔恨啦！
冠軍張舒雅玩嘢請病假退選，加上今屆華姐質素高有唔少好嘢，所以無線點都要出吓術幫吓自己人，據今屆華姐一工作人員爆料：「無線專登安排個10 號畀佢，因為佢附近號碼嗰啲佳麗大部分都係陪跑，而且由開始選嗰陣，無線已經知有邊幾個有機會跑出，所以今年忽然改制唔抽籤，傷盡腦筋先至改用地區英文字編排，總之就要避開幾位大熱啦！」
28 位佳麗分成2 組，每組14 人，細冧把佳麗平均質素都比較低，獲編為10 號的陳倩揚被編入呢班，有人墊底即時高幾班。
陳倩揚自選泳衣環節獲38 分，是眾佳麗第6 名。咪以為現場畀分好刺激，其實分數早早畀定，所謂自選泳衣環節，騷嚟啫！
冇乜友誼
自稱為參選減肥減到大髀都凹埋嘅陳倩揚，當上週五（16 日）宣布佢嗱友誼小姐時，企佢隔籬嘅11 號吉林代表劉默伊洋（左一）就唔多高興，連細獎都嗱埋，又真係好難同你扮友誼！
大熱堆
冠軍苟芸慧自選泳衣環節43 分全場最高，她被安排的索女組水準高，由冠軍打後5 個佳麗，有4 個入到8 強，鬥餐懵。
左起：冠軍24 號苟芸慧（多倫多）、8 強25 號林玉春（蒂賓根）、季軍26 號陳娜良子（溫哥華）、27 號徐莉（武漢）、8 強28 號韓曉玲（鄭州）
自己人評判
除咗改制益自己人，決賽當晚五位評判有三位係自家藝員，畀分點都手鬆啲，而且當晚連最刺激的自選泳衣即時畀分環節，原來所得分數亦是早於上週一（12 日）閉門畀落，現場著成點噏乜都冇影響，難怪連評判之一嘅鄭嘉穎都話：「冠軍（苟芸慧）就係我心水，其他我就唔想講啦！」
對於無線改例幫到足，陳倩揚就好緊張話：「吓！你想講乜呀？可能我之前有經驗，所以淡定咗表現好咗啫！」係喎！有齊天時地利人和，畀我都淡定啦！
獎金少過亞軍
今年25 歲來自多倫多嘅冠軍苟芸慧，11 歲由台灣移民加國，現於澳洲Athabassa University 讀緊工管，身材勻稱樣子四正，奪冠網友一致舉腳贊成。不過佢嗱冠軍全部獎金連獎品加埋都淨係得30 萬，仲少過嗱兩個獎嘅陳倩揚一萬，幾時都話無線鍾意益自己人啦！
反應快
嗱咗冠軍梗係要祝賀吓，28 號來自鄭州嘅韓曉玲就醒，飛身霸定有利位置加埋
低身，其他佳麗淨係見背脊，效果比得上郭羨妮對台慶咪。
勁吹得
講到明想入娛樂圈嘅苟芸慧醒呀，賽後慶功時，其他佳麗搏命搵人影相留念，係得佢坐定定同老外會計師雞啄唔斷，佢哋講乜就聽唔到，不過見佢哋吹水吹足成粒鐘，阿冠軍英文應該幾流利。
中華小姐連環
搞選美撞正金融海嘯，大會難免要縮吓皮，成晚《中華小姐》冇乜大場面，要靠班小生同兩位應屆無線歌王歌后交功課撐場，最慘係綵排唔夠成晚勁蝦碌，又播錯聲帶又有佳麗走光，無線好少咁失禮喎！
語言天才
對不柿，俄文的聞睇太爛了。
《中華小姐》在大陸佛山舉行，無線班小生喺大陸又咁受歡迎，梗係要出嚟露兩手。有語言障礙嘅吳卓羲，繼賣飛佛後又有經典，煲冬瓜問完佳麗問題時懶醒話：「對不柿（起），俄文（我們）的聞睇（問題）太爛（難）了。」香港人又聽唔明，國語人又聽唔明，正！
甩轆現貼
無線一向好緊張佳麗有冇走光，20 號西雅圖蔣妮入8 強接受訪問時竟然兩度露出乳貼，蔣妮就好淡定話：「我唔知㗎，志偉提我拉高件衫我先知咋！」
勁舞B-Boy
突然變舞王嘅黃宗澤就出嚟跳hip hop 同break dance ，左腳同右腳接近打結狀態，點都睇唔出佢原來跳緊舞，所以現場好多觀眾都睇到目瞪口呆，網友就話唔知佢跳緊乜，厲害。
