啲分析員話，而家美國佬冇銀，可能冇乜人會為咗啲花巧嘢換新OS ，但筆者就唔係咁睇喇！
科技嘢，向來都係大家互抄，當年Windows 明跟你Mac OS 玩圖像介面，今次Windows 7 向iPhone 取經，大玩multi-touch 功能，唔怕樣衰！最重要係而家Steve 叔多病痛，搞到人心惶惶，既然你哋蘋果唔將iPhone 看家本領multi-touch 指控功能移植去手提電腦，咁微軟話行先一步喇！上網睇YouTube ，見玩家用手指睇相、玩Google Maps 、彈鋼琴，真係勁爽！
DELL 同HP 已經加快速度開發篤芒電腦，呢條Windows 7 影片，就係用DELL 新機做demo 。
用手指玩map 唔係最型，你留意吓嗰啲「亂中有序」嘅memo 紙扮晒隨意。其實勁刻意，但又好型，我都好想快啲扮007 呀！
講到學嘢，微軟亦都開始學蘋果同荷里活搞合作，成日入戲院嘅朋友應該都發現，微軟成日借佢套Surface 畀荷里活片商拍戲，好似《007 量子殺機》仲有《地球停轉日》，都見到啲高官響度手指指。原來M 記目標唔係推銷Surface ，而係引你手指痕，快快手換走套令人髮「指」嘅Windows Vista ，買佢套Windows 7 。若然你想試試Windows 7 有幾好玩，而家上微軟美國官網，就有Beta 版你免費下載，直至美國時間1 月24 日都有得download 。
網址：
http://www.microsoft.com/windows/windows-7/
