每個人都有個價，名人明星闊太模特兒個價更高。唔好以為呢班星級名人出席大小活動係逢請必到，其實佢哋都好現實，無錢無禮物就睬你都傻。「車馬費」幾多就因人而異，大粒星閒閒哋三、四十萬起，人氣夠的名人亦場場過萬元，模特兒亦會樂意反串做嘉實，因為酬勞比行騷更吸引。只要勤力出騷，收入肯定好過返工。
劉嘉玲只升不跌
大星劉嘉玲近年少拍戲，主要靠拍廣告及出席活動搵銀。鬼咩，只係扮靚企幾粒鐘，三十五至五十萬酬金袋袋平安。不過，劉嘉玲向來是義氣仔女，只要透過相熟公關搭路分分鐘有價講，「我唔多唔少都會收友情價，不過唔會收海嘯價，我只有升唔會跌。」上週二，她出席矯形內衣活動，就穩袋六位數字，嘉玲仲話，只要俾得起錢，衞生巾都有得傾，唯有跟老公梁朝偉夫妻檔搲銀就咪搞，「同台做嘢會尷尬，大家早有默契不接這類工作。」
飲得杯落!（設計對白）
李嘉欣星嫁十倍A grade 的李嘉欣每次出動收足五十萬，價錢貴但勝在物有所值，事關她出席活動的前夕，往往事有「湊巧」出現大堆新聞，引來傳媒追訪。自從嫁入豪門，連價位都水漲船高，婚後唔夠三日就現身又一城出席聖誕亮燈儀式，一粒鐘就袋穩百萬酬勞，難怪她婚後繼續工作，好過攤大手板嘛。
徐濠縈只收現金
Eason 嫂徐濠縈經常被指洗腳唔抹腳，其實佢都好識利用自己身份去搵私己錢。人哋請她出席活動，她開宗明義，講明hard cash 才有得傾，仲要係十萬銀以上，否則就要睇牌子而行事。好似Prada 咁大牌子請到，又肯借埋衫，咁就有得傾。「而家唔會再亂去，只係熟朋友或鍾意的牌子先考慮。」
胡敏珊動之以情
鐘錶界靚女胡敏珊初登社交圈時密密出場，直至近年她開公司Charmonde 做老闆，出席活動就變得揀擇，更有傳她有錢收才會出現。她就笑話：「你估我係模特兒咩，係有公關俾六位數請我去，我都推咗。我只會去我鍾意嘅brand 同慈善活動，好似去spa 宣傳，佢哋會送五萬嘅treatment 俾我。」上週五晚，她就出席了好友Dorian Ho 的慈善時裝騷，一舉兩得。
唐貝詩帶挈阿媽
寇鴻萍長女唐貝詩久不久就回港賺學費，肯搏肯性感，自然多人用，價目亦會根據性感度有所提高，據知以前只是幾千元車馬費，而家就收過萬元。母憑女貴，寇鴻萍亦從中得到不少油水。好似去年九月Soho Town 只請唐貝詩出席活動，負責把關的精明阿媽寇鴻萍，阿女嗰份贊助不可少之外，更為自己力爭多個手袋，算唔算買細送大？
何超瓊只益自己
何超瓊有錢又有名，當然唔貪濕碎錢。請得佢出來應酬，多數是她的公關公司搞嘅活動，好似大客仔Piaget 有嘢搞，Pansy 就一定現身。由於公司有佢做靠山，好多客人都慕名而來，據聞數年前鯊魚女陳細潔初踏社交圈，就為此搵她的公關公司做宣傳。
