荷李活巨星韋史密夫（Will Smith ）搵自己10歲囝囝積頓（Jaden ）
飛嘅新版《龍威小子》（The Karate Kid ）籌備咗成年，一直話希望搵周星馳做導演同飾演空手道師傅嘅角色，前年韋哥嚟香港宣傳時仲同星爺見面傾合作。不過噚日美國有消息指主角人選已經換咗做成龍，導演亦會喺番荷李活搵人，睇嚟星爺繼辭演《青蜂俠》（Green Hornet ）後，又錯失另一齣荷李活片，真係非常可惜。
內地取景
一提起成龍定必想起功夫，搵佢演空手道師傅可謂最佳人選。資料圖片
美國娛樂雜誌《Entertainment Weekly 》噚日報道成龍將會飾演空手道師傅Mr.Miyagi 一角，細節已傾得七七八八，導演方面就係挪威籍嘅Harald Zwart ，齣戲今年會喺北京開鏡。《龍威小子》翻拍自80年代人氣之作，講述一位少年成日俾同學欺負，後來向日籍老師學空手道後重拾自信，最後仲贏得比賽。據悉新版故事會由美國搬到去中國，因此全齣戲會喺內地取景。馮仁昭問番星爺呢件事，但佢就唔肯回應。積頓之前喺《地球停轉日》（The Day The Earth Stood Still ）中有突出表現，今次韋哥打本捧個仔，再加埋成龍參與，應該會有好成績。
前年韋哥來港時約埋星爺閉門會談，外間以為雙方合作成數好高，但最後都係傾唔成。資料圖片
from
http://appledaily.atnext. ... art_id=12089657
