E Cup Baby 劉欣宜與36F 上圍的雷凱欣,昨日化身火辣辣cosplay 人物,殺入旺角行人專用區派福袋,雖然早前E Cup Baby 聲言封胸遭雷凱欣暗寸,不過二人再度同場未有隔胸互撼,反而E Cup Baby 借題發揮暗嘲Angelababy 冇身材拍水著寫真,更見精采。
在僅得14度的寒冷天氣下,E Cup Baby 劉欣宜與雷凱欣仍要拋胸搵食,二人昨日同以性感cosplay 打扮到旺角行人專用區派福袋,不過現場所見圍觀市民不多,平時瘋狂出動的電車男與中坑也只得寥寥幾人。
未正式上場前E Cup Baby 及雷凱欣都要披上大褸保暖。
Angelababy 日前透露會以水著寫真攻日。資料圖片
變態電話騷擾
現場圍觀市民不多,但仍有男士舉機拍攝兩位性感美女。
E Cup Baby 接受訪問時也稱不擔心混亂間會遇上鹹豬手,但已有心理準備會遭人用眼睛輕薄,她說:「有好多人保護,應該埋唔到我身,用眼望代替行動就實有,之前我俾變態電話騷擾件事,警方已經幫我落案調查,我都驚出入會有危險,已經減少出街,平時就搵阿哥同阿爸陪我去街。」有消息指Angelababy 出電子寫真攻日本市場,而早前宣佈要封胸的E Cup Baby 就大唱反調,還暗寸僅得32A 上圍的Angelababy 冇身材竟拍三點式寫真,她說:「之前有公司搵我影水著出寫真,但我推咗,因為我決定封胸唔再著比堅尼影水著,呢條路線唔能夠長久,我已經出過一次(寫真),我都收埋,唔知點解佢(Angelababy )要拍?一次就夠。」問她是否暗示Angelababy 跟風?E Cup Baby 否認說:「唔敢講,路線唔同,可能日本佢發展大好多呢!」
唔怕博懵怕凍
此外,身穿魚網戰士裝的雷凱欣,形容自己穿了件處女長裙示眾,她說:「次次都著短裙見人,今次呢條真係處女長裙,不過都有大高叉,而且中門大開,天氣雖然凍,不過我都習慣咗,雖然旺角鬧市人多,但我唔驚混亂俾人博懵,我驚凍多啲。」採訪:魯萍 攝影:仇志德
E Cup Baby (左)與雷凱欣寒天晒身材,在旺角派福袋。
from
http://appledaily.atnext. ... art_id=12085318