踏入新一年，舊年投資富通蝕到入肉嘅平安保險（2318），董事長馬明哲近日再次向全體員工發出「千言書」，勉勵員工面對磨難應該同面對財富一樣，要微笑以待。馬董字里行間毫不掩飾感慨，話：「短短一年之中，中國平安正在經歷前所未有的挑戰，投資富通已成為發展中跳不過去的一個坎」──潛台詞咪即係，既然踩中富通呢個無底深潭，都要積極應對，仲話將「發展中的挫折和磨難」，視為一筆巨大嘅財富。信中仲透露，今年平保除咗繼續快速發展保險業務，仲要加快銀行、投資等業務，大力推動交叉銷售，全面降低經營成本……講到尾，都係提醒各位員工打醒十二分精神，努力賺番舊年賬面蝕咗過筆咋！
證實首席投資官走人
投資富通唔單止令平保去年業績響起警號，而且令外界對馬董管治大跌眼鏡。一直傳出慘食「豉椒炒魷」嘅首席投資官約翰．皮爾斯（John Pearce ），日前平保發言人「終於」證實，由於合約到期，皮爾斯去年底已離開平保，暫時未有接任人選，現時投資決策都交畀總經理張子欣處理，投資團隊亦都冇其他高管離開。
馬明哲再發「千言書」，勉勵員工面對磨難應該同面對財富一樣，要微笑以待。 資料圖片
from
http://appledaily.atnext. ... art_id=12086092
