以往絕少公開與周慧敏拖手的倪震，平安夜晚卻突然高調拖實女友做騷任影，一反常態。
明嘴廿一歲張茆後大半個月，倪震的好戲都是他一個人的獨腳戲，直至十二月廿四日平安夜，他終於拖埋周慧敏出巡。
這場恩愛對手戲，當然早有預謀。平安夜前兩日，倪震book 定枱，再親挑五位好友一齊到陽明山莊食buffet 過平安夜，至於花費，由周慧敏埋單，盛惠四千元。
周慧敏、倪震入座初時並排而坐，同枱友人更幫二人拍照。
兩小時自助餐，倪震多次出去添食，但每次都一個人。
先謀後動
上演了超過半月的獨腳騷，倪震終於不甘寂寞，平安夜拖埋事發後未有公開露面的周慧敏出街做雙人騷。
「倪震早兩日已經book 定枱，又call 咗幾個好朋友到場戥腳，雖然『偷食』事件仲係風頭火勢，但倪震仍然要高調外出過平安夜，周慧敏亦任得倪震擺布！」身邊友人說。
交戲亦要有觀眾，這晚亦不例外。當晚七時，倪震與周慧敏乘保母車到達陽明山莊，十指緊扣行入西餐廳時，已早有記者守候，未卜先知。
「講真，如果倪震想避開傳媒，根本輕而易舉，好似佢同周慧敏早一日出去買戒指，都無俾傳媒發現，今次佢無諗住避，仲預告部分相熟報館，最後全世界收到風擁晒嚟，睇佢拖住周慧敏個得戚樣，就知佢根本係先謀後動。」
發現記者在外影相，倪震同朋友換位，十分玩嘢！
各有各坐
倪震從容自若，反而周慧敏表現驚喜參半，面容略有尷尬。其間，倪震周慧敏亦各顧各自己嗱嘢食，二人原本坐埋一齊，發現有記者在外影相，又刻意同友人換位分開坐。
「因為分開坐，佢兩個全晚交流都唔多，都係同身邊朋友傾偈。話題都係講番以前入行時嘅趣事，倪震亦有講吓佢嘅生意經，『偷食』件事當然無提啦！」
晚上九時，由周慧敏埋單請客，之後，眾人一同上了樓上的卡拉OK 房，但倪震、周慧敏只在內逗留了十五分鐘，又再十指緊扣拖到實離開，全程更由幾名保安開路，護駕上保母車，傳媒圍住影，全是倪震掌握之內。
○六年六月，周慧敏陪倪震替父親倪匡慶祝父親節，亦是由準新抱請客。
未爆出倪震「偷食」事件，周慧敏賺錢能力高企，九月份出席一個秋冬時裝騷，露半胸示人，交足貨。
03年回流香港後，倪震周慧敏經常被拍得出外行街，但每次都無拖手。
入行以來，周慧敏只在九五年拍過一次婚紗廣告，難怪她對穿婚紗充滿期待。
始終如一
事實上，周慧敏俾錢請客已是家常便飯，身邊的朋友亦見怪不怪。
「呢幾年倪震收入唔多，佢每次同周慧敏出去食飯，以至買衫，次次都係周慧敏俾錢，倪匡響美國返嚟之後，周慧敏每次同未來老爺食飯，都一定郁手埋單，對老人家好尊重，所以倪匡對呢個未來新抱都讚不絕口！」
雖然被外間不斷抨擊，但周慧敏對倪震始終如一，由倪震掌握一切。
「周慧敏好多朋友都係倪震介紹識嘅，好似谷祖琳，都係同倪震friend ，就算周慧敏而家個經理人，都係倪震撮合，有關佢復出所有工作編排，其實倪震都有份策劃。」
正版張茆發聲明呼冤，自稱不少照片被人移花接木。
張茆透過律師，表示只有這張在新浪網出現的相片是真實無誤。
張茆有反應
與倪震啜得連俾人閃晒影相都唔知的城大女學生張茆，本週一（十二月廿九日）透過律師發表聲明，自稱從未為事件作出任何形式的回應，她在事發後翌日即把新浪博客關閉，又自稱電腦被入侵，其QQ 被盜用，故所有網上的言論和文章均非出自她本人。
此外，她又指部分被冠其名字張茆的大膽照片，是AV 圖片及電腦加工的移花接木相，為自己平反。
倪震的Golf 坐駕。
倪震常駕駛Vivian 名下寶馬代步。（《忽然1周》圖片）
操控財權
倪震與周慧敏相戀十九年，九七年二人在樓市有斬獲，之後一同移居加拿大，有指倪震因訓身搞科技生意損手，○三年回流香港主持電台節目及寫專欄，收入有限，多年來他寄居Vivian 名下的跑馬地物業，自己冇樓揸手。
食住靠女友，平日出入的藍色Golf Volkswagen ，也是回流香港後Vivian 所送；至於女友名下的灰色寶馬房車，倪震更經常揸出揸入，當係自己。
「慳妹」Vivian 儲埋唔少，九一年以345萬購入跑馬地金山花園高層單位連車位。三年後開設Vivian Investments Limited ，再以715萬買入金山花園同層另一個逾千呎單位。九八年，Vivian 將物業以低於巿價的530萬，轉到「Deekai Ltd.」，倪震更在○六年冧掂女友令他成為「Deekai Ltd.」掛名董事。
該兩個單位現市值共約2,400萬，Vivian 早前透露，一切投資均交由男友負責管理，平日甚少過問。常言親生仔不如近身錢，「慳妹」Vivian 將理財大權交男友操控，仲有乜嘢唔得！
