現年28歲的張栢芝年初不幸捲入淫照風暴，其間多次傳出老公霆鋒要拋妻，為箍實老公，栢芝實行修心養性，不時帶埋16個月大的兒子謝振軒（Lucas ）狂冧麻煩奶奶狄波拉，最近老爺四哥及栢芝媽更承認栢芝懷孕兩個多月。
不過婆媳相處難，為了迎合尊貴奶奶，栢芝被迫思想改造，有傳拉姑多番要求侍母至孝的栢芝與混亂娘家斷交，上週四平安夜，本刊發現冇老公響身邊嘅栢芝，只是低調湊住乖仔Lucas 約埋細佬栢文，於會所內食聖誕大餐buffet ，過去栢芝逢大節都大棚happy family 情況，唔見晒。
為咗自己頭家，睇嚟磨心栢芝似乎真係妥協咗！
24/12 09:45pm
栢芝雖然懷孕2個月，不過仍然同Lucas 周圍走，陪個仔玩完車仔再去百佳shopping ，不過點玩都離唔開康樂園呢個栢芝心中的避難所。
09:15pm 三輪炒車
歲半的Lucas 玩玩吓三輪車仔，竟突然失控仆親，嚇到栢芝即時飛撲上前抱起乖仔。
大力媽咪
見Lucas 咁論盡，栢芝即時抱起Lucas 兼收車唔畀玩，只見栢芝媽咪右手抱仔左手抽車，行路仍然可以健步如飛，睇佢唔出咁大力。
07:15pm 孤清大餐
雖然有細佬栢文拉埋女友陪食聖誕大餐，但比起以前張氏一家總動員，如今栢芝同Lucas 兩母子相依為命，感覺冷清清，不過有Lucas 響身邊，栢芝亦不時流露滿足笑容。期間不少鄰居要求影合照留念，栢芝亦大方答允，好鬼順得人。
11:20pm 新竇未得
霆鋒現時裝修中、去年市值9千多萬的舂坎角豪宅，金融海嘯後勁跌2千6百萬，有傳栢芝而家響舂坎角安胎，但平安夜亦如灰姑娘般12點前返到之前租住的中半山愛都大廈，新竇仍然未住得。
靚媽精B
栢芝去康樂園會所開party 全程冇化妝，不過白滑標致的她仍然甚索，而身穿價值400蚊的法拉利厚褸的Lucas 則愈大愈似霆鋒，鬼咁精靈。
母女情深
栢芝媽Shally 多年來與栢芝感情要好，栢芝亦十分照顧母親，多年來供養父母幾家人，即使母親曾多次改嫁，仍然無損兩人之間的感情，估唔到家陣栢芝自己有頭家，有苦難言呀！《蘋果日報》圖片
栢芝生仔有功，但奶奶拉姑嫌棄外家品流複雜，早前有傳拉姑更吩咐霆鋒叫老婆閂外家水喉，要外母臨老自力更生，而向來栢芝是張家重心，栢芝深閨後亦形同散沙，據知情者透露：「栢芝媽咁多年嚟肯出嚟見鬍鬚勇都係因為栢芝想成家人整整齊齊，而家拉姑出咗聲，栢芝仲敢點啊！栢芝少搵父母，係間中同兩個細佬聯誼吓，芝媽成年冇搵前夫，連啲仔女都少見晒喇！」
歡迎合照
上週三（24日），本刊發現大肚兩個多月、腹部微隆的栢芝與Lucas 現身大埔康樂園會所，同行仲有細佬栢文及其女友，其間只見栢芝刻意選擇面向場內較少人的位置坐下，但在場唔少住客仍然認出，除不時主動上前大讚Lucas 可愛，又拉著他們合照，不過見過鬼怕黑的栢芝，對於街坊想影單人相卻好抗拒，全部禮貌回絕。
食飽晒，栢文同女友走先，孤伶伶栢芝同Lucas 到康樂園內的公園玩三輪車，但唔夠10分鐘，Lucas 突然踩翻三輪車撻低，栢芝馬上收車唔畀玩，轉去屋苑內的百佳掃貨，嫁人後母子冷清過大節。同日，本刊發現栢芝媽亦只與同居男友馮國志屈響西環店自家飯店內，冇嘢做都唔搵個女陪吓，兩母女過去形影不離嘅情況好難再見。
有細照顧大
栢芝錫Lucas 錫到燶，即使自己粗身大細亦陪Lucas 周圍走，不過近年甚少著超級名牌嘅栢芝，呢晚著住套墨綠色Juicy Couture 襯對BAPE STA 波鞋，好難睇得出佢有喜。
全套Juicy Couture $2,600
H&M 橡筋圈每揪$19.9
波鞋：A Bathing Ape BAPE STA $1,399
窮阿媽
栢芝平安夜同乖仔和細佬過，而阿媽就只係同男友於其經營的西環海鮮菜館內看鋪，平安夜都唔搵埋愛女過節。
唔知呀，唔知呀！真實對白
同拉姑相比，「斷糧」後的栢芝媽打扮明顯樸素，大時大節，面容都覺得憔悴，問佢同栢芝關係，經常唔覺意漏口風嘅芝媽就淨係大叫：「唔知呀，唔知呀！」
富奶奶
栢芝媽要看鋪，上週六（27日），拉姑就同老公鬍鬚Kong 拍住拖響中環Landmark cafe high tea ，問佢栢芝情況佢就話：「唔好講呢啲唔開心嘢！」
唔好講呢啲唔開心嘢！真實對白
專去名店
拉姑有仔有老公養，掃親貨唔係名店就係連卡佛，拉姑仲係LV 嘅VIP ，同複雜親家相比，生活層次高好多喎。
溫馨康樂園
雖然栢芝同霆鋒現時仍租住的中半山愛都大廈同舊居大埔康樂園的私人會所隔9丈遠，不過仍然發現栢芝經常返康樂園打躉玩，除咗貪康樂園夠靜可以避開狗仔隊，其實感情因素亦令栢芝加晒分，據知情者稱：「佢響康樂園住時係佢最紅時期，而且當時成家齊齊整整，栢芝鍾意大家庭生活，當時生活可算最開心，加上康樂園會所有餐廳有泳池又有波波池，佢同阿仔消磨一日都唔覺悶，好過匿響屋企坐監啦！」
聞芝變臉
拉姑跟栢芝洗腦，外家斷絕來往兼嚴禁高調出街，栢芝聖誕惟有冷清清過，不過拉姑上週六（27日）就好熱鬧，同埋老公鬍鬚Kong 拍拖到中環置地high tea ，記者問到栢芝孤清過年，拉姑就即時唔多老嚟！
F ：《FACE 》 拉：拉姑
F ：栢芝有咗喎！
拉：吓？吓？吓？
F ：四哥都認咗啦，鍾意生仔定女呀？
拉：（大笑）仔定女都冇所謂啦！
F ：聽講你唔畀栢芝見佢屋企人？
拉：（即時黑面）你哋又想講乜呀，過年就唔好講呢啲唔開心嘢喇！
媳婦變咗「唔開心嘢」，栢芝成家亦確係唔多開心，據知栢芝媽要響男友飯店幫工，栢芝爸鬍鬚勇（張仁勇）亦唔好得多，有傳佢欠下20萬波纜數，要屈蛇匿響元朗唔敢見人，冇咗大靠山栢芝，張家即時解體；成個聖誕冇同父母聚天倫嘅栢芝，上週六就再次孤獨地帶Lucas 到康樂園會所打發時間，記者上前恭喜栢芝大肚，栢芝即時好驚青地說：「呢度私人地方喎。」離去時仲call 埋細佬栢文同豪龍救駕，笠實cap 帽同口罩，謝家媳婦唔易做，栢芝辛苦晒！
12/27
平時一身Juicy Couture 的栢芝呢晚就換上adidas 襯Ape ，身上至貴嗰件係價值九千幾嘅飛甩雞毛奶粉袋，大大個乜都裝得落，栢芝做咗人阿媽特別實際。
外套：adidas 三間tracksuit $600
手袋：Salvatore Ferragamo "Fiera"系列$9,400
長褲：A Bathing Ape 約$1,600
波鞋：A Bathing Ape BAPE STA $1,399（已斷）
見光死
奶奶拉姑有密令，栢芝再唔願都要焗受，見到有記者拍照，即時call 埋細佬豪龍（左圖）幫手，離去時仲笠埋帽同口罩，好大陣仗喎！
栢芝06年同霆鋒於菲島私訂終生，已經激死拉姑，幾經栢芝LV 攻勢下，關係始轉好，家陣見奶奶多過返娘家，栢芝都唔好受㗎！《忽然1周》圖片
《蘋果日報》圖片
栢芝宣傳易
話晒做全職湊仔婆，栢芝除咗俾人影過陪奶奶拉姑同老爺四哥shopping 歎茶之外，當然唔少得做埋跟得夫人，每當霆鋒到內地或者其他地方拍戲，栢芝必帶埋Lucas 陪住老公，早輪陪霆鋒去泰國拍《風雲》就收晒宣傳效益，至上週一（22日）由霆鋒（左圖右）擔正的電影《証人》慶功宴上，栢芝亦忽然抱子高調現身（左圖左），闔家出嚟撐，報紙雜誌咪做大啲囉，老婆有價值，老公梗係好好用。
複雜芝家四散
之前成家靠栢芝照顧，家陣栢芝停工停揼水，張家各人惟有自求多福，芝媽為生計要男友響飯店做侍應，芝爸更傳欠賭債，而本刊收到消息，栢芝家姐戴碧芝上月亦帶埋囡囡返回加拿大投靠前夫，全家冇咗栢芝大水喉照住，即刻走晒樣。
家姐靠前夫
雖然戴碧芝係芝媽第一任丈夫所生，與栢芝屬同母異父姊妹，但感情甚好，06年栢芝更遠赴加拿大陪家姐產子。近年有個老外男友嘅戴碧芝，同老外男友分手後無處投靠，上月惟有攜女返回加拿大投靠前夫生活。
《壹週刊》圖片
芝爸欠街數
屬江湖中人的芝爸鬍鬚勇（張仁勇），與芝媽離婚後已再娶，並生下細仔暱稱大蕃薯（右），有傳佢年前曾於內地坐監，最近江湖傳聞又指他欠下波數20萬，現藏身元朗錦田。
豪龍最生性
栢芝親二弟，04年學玩滑水板（wakeboard ），05年開始做教練並於大埔三門仔開設「TWS 」滑水學校，現為港隊（wakeboard ）代表，據知月入達7萬，問到豪龍家姐苦況，豪龍就努力唱好話：「我早幾晚同佢食完飯，佢冇唔開心喎，ok 㗎！」
栢文貴DJ
栢芝親三弟（右），兩年前開始學打碟做DJ ，於蘭桂坊及尖沙咀名蒲場均有出沒，據知佢每小時$15,000，響DJ 界算收得貴。
封面
