雖然全球經濟放緩，但我發錢韓覺得只要肯捱，就一定餓唔死！前兩日黑仔明打嚟，話仲未搵到工唔開心，叫我陪佢去飲酒喎！我即時鬧醒佢有時間不如見多幾份工！我就知勞工處1月5號同6號喺天水圍搞咗個大型招聘會，到時一定要「的」佢去。
呢個大型招聘會有成38間公司一齊請人，當中有唔少係大公司，好似Pokka 餐廳、卓悅化妝品等，勞工處負責人何小姐仲同我講，今次個招聘會僱主會即場同求職者面試添。
帶齊履歷見工
個招聘會有成80幾種唔同工種畀你in ，大部分都毋須經驗，七成係請全職，月薪約$5,000至$15,000左右。當中飲食業最多，有成13間。Pokka 餐廳培訓及人力資源發展經理Sue 就同我講，佢哋今次喺招聘會想請40人左右。「公司擴張想請多嘅人，我哋唔係好介意學歷，中三都會請，反而著重求職者嘅誠意。我哋會請餐廳服務助理同廚務助理等職位，餐廳服務助理人工約$7,500，半年就有機會升做侍應生，到時人工會接近$8,000。至於廚務助理人工約$7,000，約做一年就可升做見習
師，人工會有$7,800。」
大家樂喺09年亦會請1,000人，職位包括店務助理、廚務助理及收銀員等，其中店務助理及廚務助理人工分別有$5,500同$6,000，兩者均無需經驗，中一就做得。而卓悅化妝品批發中心亦打算請30人，職位包括美容顧問及美容師，美容顧問中五就做得，不過最好有經驗，初級美容顧問底薪連佣金普遍人工約$15,000，3個月就有機會升做正式美容顧問，人工可升至$18,000。
其實所有職位都要求見工者有誠意，做咗培訓及人力資源超過15年嘅Pokka 經理阿Sue 就畀咗嘅貼士，去見工自備學歷證明、相片當然唔少得，而「點解有興趣做呢份工？」可以話係份份工必問嘅，一定要畀少少時間上網睇吓公司資料，唔好到時口啞啞又或者答行貨，仲有面試要喺得整齊、乾淨，千祈咪滿面油光咁去見工。
今次個招聘會分兩日進行，第一日同第二日招聘嘅係完全唔同嘅工，記得睇清楚先去！
招聘會
日期：09年1月5日至6日
時間：11am-6pm
地點：天水圍天耀村天耀社區中心地下禮堂
網址：
http://www.jobs.gov.hk/
