以前除夕倒數多數人會去Times Square ，近年又興去廣東道，不過下下同幾十萬人迫住倒數實在唔過癮！
而且倒數活動附近嘅路條條都封晒，對於筆者呢啲駕車人士實在唔方便。
好彩今年有除夕倒數詠香江，用大大座ifc 二期玩煙火倒數，終於可以他條去紅磡食個法國菜，兼唔同人迫都可以睇倒數。
牛油梨焗釀蟹肉$85
前菜已別具心思，建議用香檳伴食，味道更突出。
番紅花鮮蜆忌廉湯$39
湯的分量不算多，但食晒嘅蜆都有少少飽。
店內面積雖小，但氛氛搭夠，有點似酒店內的西餐廳。
國際都會商場旁的露天通道盡頭可看到灣仔及中環景。
小店風情法菜
紅磡係最近倒數封路嘅地方，有冇嘅唔使除夕前成個月book 枱又易泊車嘅好餐廳，可以食完行兩步就睇到倒數？梗有啦！位於紅館隔籬嘅國際都會商場，平日人流唔多，最多人都係紅館開show 前兩個鐘，而家紅館裝修，更加唔會多人。只要沿商場旁的露天通道行出紅館旁，就可以在高位遠眺灣仔及ifc ，保證人煙稀少，同女友來隱蔽倒數一流。要浪漫到盡就要倒數前入商場間別緻餐廳食個法國菜late dinner ，店內面積不大，最多只可容納28人，而且燈光及陳設都好有氣氛，十足十中環soho 區型格餐廳。
扒波士頓龍蝦伴意大利煨飯$148
約6吋長的龍蝦仔肉質比大龍蝦更爽更鮮。
智利白酒Gewurztraminer Reserve 2006（上）$220
法國紅酒Hermitage La Chapelle 2003Paul Jaboulet Aine （下）$2,200
別致美酒美食
餐廳名為「別緻」，除店內夠別致外，食品也很別致，主打高格調法菜，但價格卻頗為大眾化，一客特別的牛油梨焗釀蟹肉都只是$85，工夫錢都唔只呢個價，入口帶有牛油梨的果香，令蟹肉顯得格外清甜。此外，大廚為我們介紹了一客番紅花鮮蜆忌廉湯，用上多隻新鮮蜆煮成，配以香滑的忌廉湯，令蜆肉更美味。主菜方面，推介扒波士頓龍蝦伴意大利煨飯，配合店長介紹的智利白酒，令這頓除夕晚餐更圓滿。此外，別緻餐廳還有高級紅酒提供，好讓客人食紅肉時佐餐之用，令節日氣氛更為濃厚。
別緻餐廳Cafe Le Must
地址：紅磡都會道6號國際都會商場752舖
電話：31677175
營業時間：11:30am-3:00pm 、6:00pm-11:00pm
泊車：$17/ 小時（星期一至五7:00pm-12:00mn 、星期六、日及公眾假期8:00am-12:00mn ，憑任何消費首2小時泊車$10/ 小時）
封路以外的選擇
由於港島同尖沙咀每年都有大型除夕倒數活動，所以警方每年都會喺活動附近大規模封路，冇可能揸部車入去，不過咁大座ifc 玩倒數，較遠地方都可以望到，等我哋推介幾個唔使入封路區都可以睇得好清楚嘅秘位，等你靜靜哋玩倒數。
紅磡碼頭睇ifc 最大最清楚，不過要行多兩步路。
紅磡碼頭
紅磡可以話係最接近封路嘅地方，而紅磡碼頭就有唔少地方可以停低部車，一停低車就望到大半座ifc ，步行到碼頭盡頭就更正，不過空間唔多，三、兩pair 人已企滿。
海暉道正在唔使落車都望到。
大角咀海暉道
大角咀海邊都有靚位睇倒數，就係入貨物裝卸區嘅海暉道、櫻桃街迴旋處路邊。呢度有大條與ifc 對到正嘅長堤，部車就泊正路旁，唔落車都可以睇晒成個倒數過程。
油街停車場收費$7/ 小時，要泊海邊位就要早嘅霸位。
炮台山油街停車場
香港區搵個海邊位睇倒數較難，最好首推炮台山油街一帶海邊停車場，早到加好彩就可以泊正海邊睇，泊唔到都可以行兩步出海邊，個景有ifc 、有維港，仲有埋九龍，都幾豐富㗎！
