近日忙於宣傳新戲《梅蘭芳》嘅黎明（Leon ）日前喺杭州舉行演唱會，已經有一段時間未有返內地開騷嘅Leon 心情都相當雀躍，唔怪得佢喺記者會上又再度發揮佢金句王嘅本色，搞
成個記者會。當日Leon 喺記者會俾個司儀問到佢個三七分界髮型十年如一日，好似冇乜變過，Leon 聽到即刻嗱起支咪，以金句回應話：「其實當年我去英國讀書時已經是這樣，這個是我的習慣，如果魚柳包里面的魚柳變了就不是魚柳包，我變和髮型變是兩回事，不過我個人都是希望不變，除非真的很需要。」唔知內地傳媒聽唔聽慣Leon 嘅金句呢？
Leon 請咗應昌佑做演唱會嘉賓，兩人合唱起嚟又幾合拍。
由於近日Leon 忙緊宣傳電影，佢好坦白咁話冇乜時間練舞，好彩有女舞蹈員伴舞搭夠。
Fans 冒寒等偶像
之前大會搞咗個「尋找杭州章子怡」嘅活動，一直話得獎者可以同Leon 喺演唱會度合唱，但Leon 喺記者會話係一場誤會，不過得獎者都可以同Leon 合照，總算唔係空手而回啦！而演唱會就喺當地嘅黃龍體育館舉行，雖然當晚氣溫只得三度兼落住微雨，但係唔少fans 居然冒寒喺場館必經之路等Leon 架車經過，即使只係望到架車都心滿意足，內地嘅fans 真係好熱情。今次演唱會最貴嘅飛成3,000幾蚊，最平都要成200蚊，不過依然全場爆滿，Leon 仲搵咗應昌佑做嘉賓，而Leon 喺演唱會度仲著到花花碌碌，同平日官仔骨骨嘅佢好唔同，令人眼前一亮！
黎明一身花花碌碌嘅打扮，真係幾有節日氣氛喎。
FROM: 頻果日報
