台灣熱爆電影《海角七號》掃到嚟香港，部份旅行社開始搞啲海角七號拍攝場地團。小妹睇完齣戲都好鬼感動，但跟團去好似趕鴨仔咁冇晒浪漫mood ，決定同男友自助遊。小妹stay 喺高雄，諗住day trip 去墾丁，落機即刻去咗火車站附近嘅墾丁旅遊達人網（http://www.dotzing.com.tw ），報咗佢哋海角七號一天團。呢個團勝在兩人成行，每人350蚊（港幣，下同），包晒成部車同司機，由高雄到墾丁全日玩足8個鐘。載我哋司機兼導遊叫小梁，係墾丁原居民，開設嘅旅遊公司（http://www.wretch.cc/mypage/k85345162）同達人網掛單。小梁話，一大班人嚟玩直接搵佢包車仲抵，部車最多可載6人，收費一個鐘100蚊，8個鐘800蚊，平均每人133蚊。兩個人嘅話經旅行社就抵啲。由高雄坐車到墾丁兩個幾鐘，來回300幾蚊齋坐車都抵。小妹去咗女主角入住嘅夏都酒店，又去咗男主角阿嘉嘅屋企、恆春古城等等，包車自己話晒事。最浪漫去男女主角相擁嘅白砂，男友同小妹講咗句戲中經典對白「留下來，或我跟你走」。冧晒！玩到
梗係要食嘢，小梁話呢度最出名食海鮮，我哋結果去咗恆春後壁湖漁港鮮魚區嘅「邱家海鮮小吃」。老闆娘芸姐話，佢哋本身係漁民，天未光捉啲魚上岸賣，所以海鮮又平又新鮮。喺呢度食海鮮一碟碟計，有埋價錢表，遊客唔會俾斬到一頸血。小妹點咗酥炸蚵仔同青菜，各25蚊，白灼蝦63蚊，仲蒸條魚都係50蚊。兩個人160幾蚊就食到飽晒。電郵：mailto:shoppingjing@appledaily.com逢周日刊出
《海角》自助遊吃海鮮，又平又新鮮（左圖），恆春夏都酒店是必遊景點之一（右圖）。
FROM: 頻果日報
