張永霖俾傳媒圍住，最後要楊受成出手解圍。
上星期五（十九日）晚，元旦上畫嘅大陸著名導演陳凱歌新作《梅蘭芳》首映，同香港傳媒勢不兩立嘅女主角章子怡照例冇影，得番男主角黎明獨撐。
不過，當晚黎明一樣唔係主角，事關有個比佢風頭更勁嘅嘉賓蒲頭，對方就係亞視變天嘅主角人物之一，現任亞視執行主席張永霖。張主席一到，就俾傳媒重重包圍訪問唔郁得，搞到主人家英皇老闆楊受成要塞入記者堆搶人。
至於黎明全晚就冇人理，主角變茂四，真慘！
貴賓撐場，楊受成第一時間安排張永霖上台影相。
章子怡唔見人，黎明同片中演員孫紅雷、陳凱歌太太陳紅（中）現身首映造勢，料不到俾張永霖嗱晒彩。
