好味！阿倫，呢啲係未叫阿二靚湯呀！（設計對白）……慶祝開騷，通常都係飲香檳，但左麟右李嗱住通花碗飲湯，寓意「頭啖湯」搶攻新紅館開騷。
紅館裝修明年完工，搶頭啖湯開騷係「左麟右李」演唱會，上個禮拜五（十二月十九日）兩位主角喺尖沙咀舉行記者會。
減肥成績理想、腰圍冇咗四吋嘅阿倫，當日心情勁high ，為答謝東亞運動會借出場地開騷兼做埋點名贊助商，阿倫同克勤即席表演耍劍同划艇，展露輕巧體態。
農曆年大年初七（二月一日）開波，暫定七場，阿倫大賣廣告話會加設「揀篤笑」時段，內容圍繞娛樂八卦新聞，但由於題目太多，佢話應該無位重溫陳冠希淫照新聞，不過一定會講上任十二日就落台嘅亞視行政總裁「王基維」。
名都噏錯！拍檔克勤即時糾正係「王維基」，阿倫就死撐：「佢咪好似啲基圍蝦咁一彈就走囉！」
預演棟篤笑，阿倫再將經典舊歌套用喺周倪聯婚事件：「我冇資格評論呢單新聞，就好似我首歌咁《情憑誰來定錯對》。」得得得，八珍get 到晒！
市道唔好，左麟右李印製大批「09唔使驚」利是封同揮春大派街坊，現場混亂到幾乎推冧圍欄。
唔使錢，人人爭住搶，就算跌落地下都執番。
耍劍、划艇，瘦身後嘅阿倫fit 到漏，減埋個雙下巴的話，望落仲後生過克勤。
