闊別香港14年，劉錫明還是那個劉錫明。沒有中年發福，只是眉宇間有點滄桑，幸好，身上冇「毒瘤」。本是無線力捧小生，因倪震洗腦式的「毒瘤明」攻勢弄得無立足之地，14年來中港台三地飄泊。大家都以為事件源自兩男一女爭風呷醋式抹黑，原來倪才子所做一切，只為提高《YES!》銷量。劉錫明昨日接受本報專訪時更直認，周慧敏一早知情，更曾深夜致電向他道歉。倪震自詡辦過香港最暢銷雜誌，當年被他踩到盡的劉錫明，應記一功。
劉錫明17年前因為一句欣賞周慧敏（Vivian ），遭倪震口誅筆伐，在他自詡為「最暢銷雜誌」《YES!》中冠之以「毒瘤明」惡名，越鬧越好賣，最後迫得劉錫明離開香港，轉攻台灣，變成一棵「無根草」。但原來內里還有故事。劉：劉錫明 記：記者記：倪震日前向你道歉，你話已經接受咗，但係咪真係釋懷？劉：釋懷咗好耐，反而媽咪仲好嬲，可能因為我係孻仔，佢好錫我。噚晚（即前晚）我同媽咪食飯，勸佢唔好再嬲，佢就話：「而家先嚟道歉？都十幾年啦，而家道歉有乜嘢用？」
劉錫明當年與周慧敏合作《烏金血劍》結緣，卻因讚過周慧敏一句而被封「毒瘤明」。 劇照
倪震當年靠「毒瘤明」三字推高《YES ！》銷量，周慧敏一早知情，更曾代男友向劉錫明道歉。 資料圖片
倪震谷書周慧敏：勸極唔聽
闊別香港十數年，劉錫明回來了。揭到陳年《YES ！》中的周慧敏訪問，大字標題：我回來了，劉錫明大笑：「乜咁蹺呀！」
記：其實當年件事係點？劉：由91年開始，我已經冇同Vivian 聯絡，真係驚咗。唔記得係93年底定94年頭，有一晚，11點幾，Vivian 打畀我，同我道歉，話唔好意思，佢話：「我知道發生乜嘢事，我知道佢咁樣寫你係唔關三角關係事，而係寫完之後本書好賣得，所以繼續寫。我有勸過佢（倪震），但佢唔聽。」我就話：「唔寫都寫咗咋，算啦，你再勸下佢，叫佢唔好再寫啦。」記：之後你就去台灣？劉：94年我同TVB 約滿，我覺得留喺香港都冇發展，吳麗珠介紹咗台灣製作人王長麗畀我識，我就簽咗佢，去台灣拍劇、出唱片。95年識咗我太太，01年結婚。91至93年，我經歷人生低潮，點知去到台灣竟然絕處逢生。劉：00年民進黨上台，太太就勸我去內地發展，但當時遇到好大困難，我惟有靠自己克服、慳啲使。當時媽咪喺香港，太太喺台灣，咁多年就係中港台飛嚟飛去。01年我拍咗部劇集《新一支梅》，02年喺內地播，終於打開知名度，喺內地每個月都有登台騷，仲有唱片公司簽我。而家嘅生活，都夠餬口。記：囡囡02年出世，令你有乜嘢改變？劉：個女出世之後，我發覺自己變咗好多，眼神都柔和咗。忽然覺得，我有個幸福嘅家庭，有三個哥哥一個妹妹喺香港睇住媽咪，已經好滿足，喺過刻開始我真正原諒咗佢（倪震）。記：滿意而家嘅發展嗎？劉：因為我比其他人早去內地發展，識咗好多製作人，又簽埋內地經理人，出年我仲會做埋製作，拍一部劇集，搵老闆投資。我唔係叻人，又唔係要做天王，總之唔強求，賺到錢夠養屋企人就已經好滿足。
想返娘家拍無線劇隨遇而安
脫下了巨型玉戒指和嗱命黑超的劉錫明，看來順眼很多。
記：有網民要求無線搵你返去拍劇，你有冇興趣？劉：TVB 係我娘家，如果可以返到去係好事，不過經濟咁樣，唔係話想返就返到，總之隨遇而安，唔強求喇。記：人人都叫倪震做「毒瘤震」，係咪有少少心涼？劉：唔會。己所不欲，勿施於人，當年我試過俾人叫呢個名，好明白呢種痛苦，都唔想其他人承受。雖然大家都話係報應，佢（倪震）都話係，但我唔認為將痛苦加喺人身上係一件快樂嘅事。希望大家放佢一馬，畀條路佢行。而家佢哋修成正果結婚，呢個係佢哋嘅決定，唔需要咬住唔放。採訪：陳月媚 撰文：吳佩思
小八卦：「我回來了」一語成讖
劉錫明17年前讚過周慧敏一句，其情敵倪震即在旗下《YES!》雜誌，用「毒瘤明」惡號不斷抹黑他。劉錫明昨日接受本報訪問時，翻看本報記者千辛萬苦找來、92年出版、內有「毒瘤明」報道的《YES!》雜誌，他反應很大：「吓，咁你哋都搵到呀！」劉錫明翻看期間神態自若，但冷不防揭中標題為「我回來了」的周慧敏專訪，禁不住笑了出來，有意留港發展的他更說：「哇，乜咁岩，呢個世界真係咁岩得咁蹺嘅！」
劉錫明昨日拿著92年3月出版的《YES!》，「毒瘤明」舉目皆是，他淡然一笑。該期雜誌出版之時，他已不敢跟周慧敏來往。攝影：葉君海
FROM: 頻果日報
