呂良偉、戚美珍同袁詠儀（靚靚）等一班演員噚日喺將軍澳電視廣播城為新劇《金錢誘罪》開鏡拜神，因為噚日係阿呂生日，眾女一齊送上香吻，真係艷福無邊。但因為要開工，阿呂話前一晚已經同朋友慶祝，問到有乜生日願望，阿呂坦言希望生多個女，佢話：「我想㗎，我同太太冇乜嘢唔OK ，何況阿仔又大個咗，總之隨時ready 。」
壽星佬阿呂同即將生日嘅戚美珍獲大家送上巨型生日卡。
羅嘉良同郭可盈咁耐冇合作，希望喺新劇度擦出火花。
戚美珍唔陪仔女
至於下月5日生日嘅戚美珍，當佢知道當日撞正周慧敏同倪震結婚，佢笑笑口話：「過日係好日子，希望快啲結婚、快啲生仔。」佢仲透露原本計劃同阿呂一齊慶祝生日，但因為大家都要開工，所以惟有取消，佢作狀苦笑話：「我今年嘅聖誕、元旦同農曆新年都冇假放，甚至冇時間陪仔女讀書，不過我都唔介意，事關我真係好鍾意呢個劇本，我唔敢講今次係咪代表作，但係我想畀自己一個紀念。」至於日前曾有消息指戚美珍同郭可盈不和，戚美珍話：「呢啲係例牌菜，我以前做觀眾過陣都睇唔少，差唔多部部劇都有呢啲新聞，阿呂都係咁樣同我哋講。」羅嘉良同靚靚日前拍咀戲，有報道指嘉良形容咀得好爽，佢聽到馮仁昭咁講，佢即刻話：「我冇講過呢啲嘢，咁寫好敏感，對我個人素質有影響，就算對手有冇老公都唔會咁講啦。」雖然嘉良與靚靚首次合作，但就大讚佢夠專業，而且仲好有默契。
呂良偉噚日生日，袁詠儀即刻送上香吻祝賀。
FROM: 頻果日報
