關菊英挾《無心害你》一曲競逐樂壇頒獎禮大獎，大戰年輕近20年的勁敵謝安琪，菊姐為求靚靚出席盛會，早前專程往銅鑼灣狂掃護膚品，其同性密友周偉利（Willy ）陪伴身邊之餘，一見菊姐揀岩心水，二話不說即時畀錢，比男人更疏爽，抵菊姐勁讚她體貼入微。
年屆50歲的關菊英憑人氣電視劇《溏心風暴之家好月圓》主題曲《無心害你》唱紅，將在下月舉行的《十大勁歌金曲頒獎典禮》上惡鬥31歲的謝安琪，競逐金曲金獎。
西裝滲陽剛味
關菊英由一身老西打扮的同性密友Willy 陪同買護膚品，二人有傾有講，默契十足。
面對一眾樂壇後輩，菊姐當然不容有失，未鬥獎先鬥狀態，早前她便由同性密友Willy 陪同去銅鑼灣連卡佛，狂掃護膚品，為備戰悉心裝扮。當日菊姐未有化妝，身穿深沉色衣物，跟同色系列打扮的Willy 襯到絕，Willy 一身整齊老西，造型與男士無異。當菊姐在MOLTON BROWN 專櫃揀護膚品時，一直在旁陪伴的Willy 還細心畀意見，又跟她一起揀選，二人有傾有講，未幾菊姐揀中兩支護膚品，Willy 隨即從褲袋掏出銀包，自動自覺埋單畀錢，非常識做。其間菊姐發現記者在場，但她仍落落大方，繼續轉去另一化妝護膚品牌Aesop 的櫃位選購，而Willy 則蹺起雙手等候，偶然又傾電話，有如大忙人一樣。由於菊姐揀護膚品需時，中途Willy 曾逕自走開，數分鐘後才折返會合，但今次菊姐未有斬獲，只拉著Willy 往停車場取車離開。
大讚體貼入微
店員介紹護膚品時，關菊英（左）和Willy 並肩細心聆聽。
當日見Willy 對菊姐表現體貼，靜候她揀選物品時，絲毫沒有不耐煩，細心程度爆燈。難怪菊姐與Willy 交往年多來感情有增無減，她更曾公開大讚Willy 體貼入微，令她十分享受。採訪、攝影：娛樂突發組
關菊英（左）揀中護膚品，一直在旁的Willy 隨即畀錢。
FROM: 頻果日報
