食聖誕大餐，睇燈飾，和她過一個浪漫聖誕……你以為！我看是平白浪費了這讓Sweet 升級嘅好時機。既然例牌節目你我他如是，想一夜到位，令佢傾心，就要花啲心思，谷行浪漫氣氛。用整個維港嘅璀璨燈飾佐餐，又或喺一片充滿藝術感嘅歐洲風情間深情細語……點睇？仲唔勝算在握？記者：黎頌詩攝影：譚盈傑Model ：Vanessa 、Fu （Stage Models ）
食靚景 腳下燈飾佐餐
要與別不同，唔好淨係識得迫喺維港兩旁睇燈飾，用不一樣嘅角度睇，感覺亦會截然不同。上山頂食聖誕餐，邊食邊睇，只要安坐窗前，就可以一口氣睇盡維港燈飾。上個月先喺佈置同菜式方面都以全新面貌示人嘅Pearl on the Peak ，聖誕例牌旺場，大家不嫌山長水遠，當然不僅為了美食當前，落地大玻璃前嘅動人美景，肯定應記一功。聖誕餐牌選擇多，唔怕佢腌尖無嘢岩。4道菜式份量唔算迷你，肯定唔會食完要靜雞雞消夜，而且全都精緻夠心思，有蝦子香味嘅吞拿魚芝士卷頭盤最得我歡心，大廚就推介連食家都讚嘅幼滑火雞。腳下嘅璀璨，加上聖誕布甸酒香帶嚟嘅微醺，感動，來得很易。
■連食家都讚幼滑嘅原隻火雞夠驚喜，$480/ 隻
■怕選肉眼扒做頭盤稍為平凡了點？拍檔係黑松露薯茸，即時加分。
■頭盤是吞拿卷水牛芝士，撒上蝦子，味道有層次感。
■亦可選火雞及火腿片作頭盤，伴以梨同香草栗子茸，夠應節。
■南瓜湯用嘅係有機南瓜，注重健康嘅佢，實冧。
■冧酒及白蘭地浸嘅乾果做成布甸，淡淡酒香延續浪漫氣氛。
Menu
煎吞拿魚芝士卷琵琶蝦南瓜湯肉眼扒配黑松露菌自家聖誕布甸
查詢：Pearl on the Peak （28495123）平安/ 聖誕夜晚宴：$985/ 位（今日預訂價：$886/ 位）地址：山頂凌霄閣1樓2號
食氣氛 藝術味谷情調
■Aspasia 以歐式陳設取勝，一室淡紫加古典屏風，食佳餚、也食氣氛。
你身旁嘅佢可能堅持：聖誕，充滿歐洲味道才叫浪漫。想喺一室溫馨寧靜嘅古典歐陸情調中，同佢旁若無人卿卿我我？喺喧鬧嘅市區心臟一樣得！燈飾集中地尖沙嘴，精品酒店帝樂文娜公館內嘅意大利餐廳Aspasia ，好歐洲。用淡紫做主調，古典屏風、枱燈、座椅，每個角落，都搵到歐式浪漫Feel ，未開餐，已經情緒升溫。上菜，浪漫感又再堆積。平安夜晚宴6道菜式，龍蝦頭盤已叫人眼前一亮，整道菜就粉飾得似件藝術品，邊食邊欣賞，佢都會讚你夠品味。Aspasia 嘅菜式小巧，件件似高級精品，食材配搭同味道，都夠別出心裁，你嘅味蕾，以致視覺，都係享受。唔好忘記，餐後要擁住沉醉喺浪漫中嘅佢，鑽入同樣醉人嘅燈飾叢中，繼續浪漫……
■清湯意式雲吞嘅淡香，跟黑松露嘅濃香，配合得恰到好處。
■好可愛！暖心朱古力、肉桂雪糕加紅酒無花果，有種甜入心嘅快樂感覺。
■松露近年大熱，牛柳粒配牛肝菌嘅主菜，一樣有松露薯茸做配角。
■聖誕日設5道菜式晚宴，主菜為牛柳伴栗子茸無花果。$988/ 位
Menu
龍蝦薄片巴馬火腿配藍芝士烤多寶魚扁豆忌廉婆羅門參湯鵝肝意大利雲吞佐黑松露和牛牛肝菌松露薯茸肉桂雪糕紅酒無花果
查詢：Aspasia （37638800）平安夜晚宴：$1,388/ 位地址：尖沙嘴金巴利道39號帝樂文娜公館一樓
