開心食飯 趙式浩跟靚女友人非常投契，三句唔埋就大笑。
風流的趙世曾換女如換衣，主張多女友不結婚，廿五歲的兒子趙式浩（母親為盈盈）剛好相反，兩年以來都對拖友、陳寶珠姨甥女羅苡芝一條心，每次總孖住女友出席大小活動，可惜他們近月感情有變，表面上看似恩愛如昔，實情早就分手兩個月，為免麻煩，於是夾埋扮情侶繼續做戲，但趙式浩亦開始約會有機會發展的女朋友。
上週五晚，趙式浩就與長髮靚女撐枱腳歎紅酒，同晚羅苡芝卻單拖出席其他派對，明顯各自尋歡，但他們仍夾晒口供話：「我哋都冇分手。」反而趙世曾明潑冷水，「佢哋不嬲只係朋友。」
幾杯紅酒落肚，式浩忽然拉住靚女手仔，引到對方哈哈大笑。
靚女煙癮起，二人移師室外繼續傾。
他們開了兩三支紅酒暢飲。
式浩平日見客表現嚴肅拘謹，鮮有在鏡頭前如此真情流露。
女友重事業
趙式浩（Howard ）對女友愛護有加，可惜女方事業心重，顧住工作又忙於讀碩士，根本沒時間拍拖，「Howard 好想女友響身邊支持佢，等佢安心發展事業，點知佢女友越來越有野心，想做女強人，經常應酬識人，最近仲做埋舞台劇，梗係冷落男友。」二人感情轉淡，女方更要求冷靜期，即使上月九日初男友搞生日派對，請了霍思緯及成班好友到趙苑歎大閘蟹，卡拉OK 直落，羅苡芝都沒有出現，趙式浩亦於個多月前開始約會其他女性朋友。
買嘢
食到凌晨十二時多，兩人更孖住到便利店買香口膠。
式浩佳人有約，羅苡芝則單人匹馬去派對，係咪分手？你話呢？
歎足一晚
上週五中午，趙式浩先跟幾個女性友人出席女性內衣騷，晚上八時放工後，由司機揸車到中環接了一個長髮靚女，往上環新紀元廣場Gaia 意大利餐廳撐枱腳嗒紅酒。二人單對單坐足四小時，有講有笑不特止，趙式浩更開心到主動摸女方手仔，友好關係不言而喻。同一時間，他的「女友」羅苡芝則單拖到灣仔出席Replay 派對。
明明各自各精彩，趙式浩卻死口不認，本週二還力撐到底，「都話唔係分手，佢好忙先少見啲，嗌吓交梗有，嗰晚同朋友食飯只係傾嘢。」羅苡芝亦夾了口供，「點解咁傳？我認我好忙少陪佢，咁佢搵朋友spend 時間都好應該，我對佢有信心。」查實二人訂下協議將分手保密到底，「女方唔想在舞台劇前後有負面新聞，所以Howard 先唔肯認。」知情者說。
兒子將成為卓能集團接班人，父親趙世曾希望他以自己作為借鏡，「式浩成日同一個女仔出街，我會同佢講，要轉吓女朋友先得，我叫佢要拍散拖，唔好諗到咁長遠，當識個朋友好喇！」
上月九日式浩廿五歲生日，壽星仔請大班朋友返趙苑慶祝，獨欠女友羅苡芝，右二為霍思緯。
今年母親節，二人感情未變，晚上還跟式浩母親盈盈食飯慶祝。
鼓勵拍散拖
至於一直不睇好他們的趙世曾，更認為羅苡芝樣貌一般，即使她是陳寶珠姨甥女、第一代「神鵰大俠」羅樂林與陳寶儀愛女，始終非名門望族，「佢爸爸想個仔搵個門當戶對嘅女友，因為佢會陸續將生意交俾個仔打理，依家Howard 約啲女仔都係有家底，佢最想搵個係穩重又低調嘅女仔。」對於兒子甩拖，趙世曾全不知情，但亦因如願以償而高興，「乜女友啫？佢哋不嬲係普通朋友，我都話識多啲女友會開心啲。」
