旺角青年就業起點唔只搞招聘日，仲辦埋面試前講座，令冇經驗嘅年輕人大大減低撞板機會。
各行各業愁雲慘霧之際，有乜實際得過「製造就業機會」，我發錢韓就八到元綠壽司同加州紅分別都勁請人，職位加埋超過80個，最重要係大部分職位毋需經驗，中三學歷都冇問題，畀咗好多剛出嚟做嘢嘅年輕人一線搵工希望。
前者仲喺招聘前搞個「見工一條龍」，搵青年就業起點整咗個「求職講座」，務求班後生見唔成工都有嘢學，真係有心。
元綠喺12月11日舉行嘅招聘日，會聘請侍應生、初級廚師、收銀員、電單車速遞員、廚房助理、店鋪客務大使共6個職位，名額約50個。除電單車速遞員及店務大使需要一年以上有關經驗，其餘post 只須中三學歷，18歲以上，當然你三、四十歲都無任歡迎，更毋須經驗。侍應生、初級廚師同收銀員嘅職位，月薪有$6,500或以上，兼職時薪都有$24，店鋪客務大使月薪更有$8,500或以上，不過就要中五學歷及1年經驗。
元綠壽司提供約50名空缺，大部分唔使經驗，新鮮人福音。
教你點見工
呢個招聘日最特別之處，就係喺正式面試前幾個鐘會搵嚟青年就業起點，搞咗個見工講座。負責呢次招聘日嘅何先生同發錢韓講：「好多冇求職經驗嘅年輕人，喺面試時唔識點present 自己，扣晒印象分。好似請侍應生，主考官幾乎實會問佢做侍應嘅工作範圍，如果隨便答：『執枱囉！遞
囉！』咁就扣晒分。應該有自信咁答：『做好餐廳入面落單、遞菜同為客人解答基本疑難，令客人滿意咁享用餐廳嘅服務。』即時對你加晒分啦！」何先生表示，其實唔止元綠，好多飲食集團請人都在意見工者對答反應快（但唔好搶住講）、有良好溝通能力同誠意，學歷反而係次要。計我話就算見唔成，聽完個talk 起碼唔會喺涼鞋短褲去見工咁冇規矩先呀！
至於加州紅，呢排搞咗唔少活動為各行各業逆市打氣，集團主席駱國安先生話對前景非常樂觀：「我覺得飲食娛樂業喺而家反而有得做，嘅人冇錢去咁多高消費娛樂場所，但始終要搵個聚腳地減壓，唱K 就係一個好場地。所以我哋會請人。」
加州紅行政及人力資源部李小姐就話：「我哋請接待員同侍應共約30名，要有中三學歷及要有一年相關經驗，中五就無須經驗。面試時最緊要反應快、對答親切有禮。」有興趣可先致電查詢，由加州紅安排到指定分店面試。
元綠壽司招聘日
地點：旺角朗豪坊青年就業起點
時間：12月11日2pm-6pm
查詢熱線：21118533
加州紅招聘查詢熱線：21804122
