聖誕就到，聖誕廣告排住隊出場，FBI 就留意到迪士尼最新嘅《閃亮聖誕》電視廣告女主角好鬼省鏡喎，原來佢拍過戲㗎！
呢位迪士尼新CM 女名叫關之彤（Trish ），今年25歲，有倫敦大學經濟系學位。Trish 原來響04年被60年代武俠女星徐楓發掘而入行，當時憑住Rejoice 洗頭水廣告入面嘅長髮㗎妹彈出，之後拍咗十幾個平面同電視廣告，之後仲撈過界，分別客串過電影《甜絲絲》同《獨家試愛》，響《獨》片飾演Stephy 怪雞表姐嘅Trish 仲因為借自己啲核突衫畀Stephy 著，搞到Stephy 都由靚女變醜女。
Trish 響迪士尼CM 咁靚女，真係估唔到佢做醜女一樣得喎。
扮㗎妹 04年關之彤已經響Rejoice 嘅廣告非常搶眼，當年有人仲以為眼仔碌碌、皮膚白滑嘅佢真係日本妹添。《蘋果日報》圖片
怪表姐 關之彤（左）響《獨家試愛》飾演Stephy 表姐，性格同打扮都古古怪怪，Stephy 同方力申冷戰，走咗去投靠表姐，唔夠衫仲要「焗」著表姐核突衫。
迪士尼新一輯聖誕電視廣告女主角Trish ，原來拍過《甜絲絲》同《獨家試愛》，佢話：「新人嚟講我已經好好彩。」不過聽講Trish 因為父母反對，拍咗兩套戲就淡出娛樂圈，最近只客串拍廣告玩吓。
Trish 同台灣男模響迪士尼聖誕篇新CM 入面扮情侶，兩個人望住個落住雪嘅城堡笑到瞇晒眼，浪漫到暈。
有網友仲話Trish 似周汶錡，冇咁熟吓嘛！
似周汶錡？
