穿藍色西裝褸、牛仔褲與白帆布鞋，眼前的甄子丹復古斯文而不失動感。身後是新片《葉問》的宣傳照，想叫他擺出同樣的出掌姿勢，他說：「會唔會好娘？」訪問完結，拍硬照，本應保持面部表情不動的子丹仍意猶未盡，攝影師一停下，即密密sell 他的新片。戒了煙的他為演好葉問這角色，日夜擔住煙仔學到形神俱似，惹來嬌妻埋怨。 撰文：簡雪瑩、魯萍
葉問，何許人也？一代宗師，李小龍師傅，詠春拳在香港的發揚人。甄子丹在新片《葉問》中飾演這個傳奇人物，他日前接受訪問時坦言該片的武打設計是難度最大的一次：「之前嘅功夫電影，可以有好多變化，但《葉問》全部要打詠春。詠春由近身搏鬥拳演變成為實用搏擊術，來來去去得三套，之前嘅功夫電影已經打到全世界人都識。點樣畀到新嘅嘢？」
甄子丹曾向葉問兒子葉準（右）請教如何演得更神似。 資料圖片
一代宗師葉問（左）是李小龍（右）師傅，更將詠春拳在港發揚光大。
日食一餐減磅
甄子丹（右）坦承《葉問》的武打設計是難度最大的一次。 劇照
在《江山美人》開拍後便接到《葉問》的邀請，從那時起甄子丹就進入了葉問的角色，他說：「好畀心機咁搜集資料，仲走去佛山請教葉準（葉問的兒子），體驗生活。花咗9個月時間，難在演好呢個人，佢嘅一點一滴都想捕捉到。」連隨意的一句話甄子丹都會請教葉準：「係葉問嘅話會點講？」當甄子丹拍電影《畫皮》時，他又找人搬了一個重達300磅的木人樁到酒店練詠春：「每晚打到
啪啪，影響到周迅、趙薇等演員休息。我99年戒煙，葉問本身有食煙，初時拍我食煙，導演話我做得唔似，我要求畀一個禮拜我，返到酒店日夜擔住支煙係咁食，搞到成層樓都係煙味，神韻學到似再拍。」甄子丹續說：「葉問本身比較瘦，我每日只食一餐，終於減咗20磅，當時仲要拍打戲，真係付出好大，成個人完全入咗去佢個世界度甩唔到，返到屋企都著住長衫，試過入戲太深，連著衫、行路都回復到30年代，連我老婆都埋怨。」
婚姻體驗演技
與嬌妻汪詩詩結婚後，甄子丹才領悟何是演技，四口之家令人羨慕。 資料圖片
說到老婆，甄子丹不無感慨：「我真正領悟到乜嘢係演技，係同佢結婚後，真正有咗家庭，先知道乜嘢係生活，先能領悟到角色。過種體驗，任何先前嘅武打都無法取代。」甄子丹說自己要求高，苛刻到有人說和他合作不舒服，其實他對人嚴，對自己更嚴：「一日只食一餐甚至只係飲水。」甄子丹又說：「我越熟識葉問，越覺得我哋似。葉準從開拍時就話我似佢爸爸。我理解嘅葉問係一個書生，非常生活化、顧家、低調。點樣想像一個一代宗師，當年喺旺角開拳館，但係根本冇門牌，試想佢收嘅徒弟都係醫生、律師（世家子弟），就會知打嘅都係少爺拳，含蓄優雅。佢嘅性格最得意嘅係幽默風趣，鍾意窒人，落咗人面又笑笑口咁。呢一點好現代。」攝影：仇志德
棄荷李活轉攻內地
甄子丹出身自武學世家，母親麥寶嬋是世界聞名的武術家和太極高手，走上打星這條路似乎理所當然。但你有所不知的是其父甄云龍、《星島日報》的波士頓編輯，會演奏小提琴及中國樂器二胡。這樣的家庭，文武雙全。甄子丹一貫以來繼承母親的天賦，可是父親文人的性格呢？也許在結婚生仔後，整個人都變得溫柔，那些從前察覺不到的性情，才開始顯現。這個表現的契機，拜《葉問》所賜。
甄子丹嚴肅背後原來都有幽默一面。
期盼尋求突破
之前拍《畫皮》發現原來甄子丹也有喜劇感，他表示都想搞笑，只是給功夫壓住。今次拍《葉》片演帶點優雅的書生形一代宗師，問他是否想轉型？甄子丹說：「冇刻意諗過，我為自己能夠身為動作演員而自豪，功夫片係中國人電影最寶貴文化遺產，亦有市場價值，如果將來去到有一日我再打唔郁，我會轉居幕後，打功夫廿幾年，我覺得自己係有責任同使命感，到而家仍然想去尋求突破。」多年前甄子丹以真功夫打入荷李活，原來他的目光早已由荷李活轉移到內地，他說：「已經冇話乜嘢荷李活市場啦！大家睇住內地市場呢塊大肥豬肉，我幾年前就睇到呢點，所以轉番香港拍戲。」
甄子丹要求很高，對其他人嚴，對自己更嚴。
