在金融海嘯沖擊下，各大小企業相繼裁員縮減開支，就連身為電視界一哥的無線也不能倖免。原來無線除明日裁員212人外，藝員傾新合約時也會被凍薪，日內跟無線續約的好姨薛家燕首當其衝。楊怡昨日謂不用減薪已很好，至於陳豪和李詩韻等更表示願意減薪共度時艱。
無線製作資源部總監樂易玲昨日在將軍澳出席王祖藍的《處處祖藍》新碟發佈會時，提到無線明日會向212名員工派大信封一事，她說：「大家都係為咗公司可以健康正常咁去運作，今次金融風暴大家都覺得好嚴重，所以要好好計劃未來，作為公司高層，亦都好體諒管理階層好難去決定，所以我都有叫同事同主管大家咬緊牙關，要共度困難時間。」今次無線裁員雖然只向幕後工作人員開刀，但樂易玲表示藝員也會面臨凍薪，她說：「藝員方面唯一受影響嘅，係佢哋會合約凍薪，近呢幾個星期同部份藝員傾新約時，都有同佢哋講（凍薪），佢哋都話冇問題，為咗顧全大局，所以大家都要體諒去面對呢件事。」
以《淘氣雙子星》劇中學生造型示人的陳豪，表示不介意減人工與公司共度時艱。
無線高層樂易玲（左）昨與吳雨一起出席王祖藍（中）新碟活動時，透露續新約藝員會被凍薪。
好姨續約首當其衝
問到有那些藝員續約，樂易玲以公司機密為由拒絕透露，但好姨薛家燕昨日在將軍澳電視廣播城為《家燕媽媽的綠色聖誕》錄影時，卻自爆被凍薪，好姨說：「冇辦法，呢個係環境問題。我下個禮拜都會簽約，係冇減，但係都冇加。」至於陳豪、楊怡及李詩韻等昨日在屯門出席《TVB 周刊》活動，先後換上戲服扮演《淘氣雙子星》、《妙手仁心》及《野蠻奶奶大戰戈師奶》等劇集的經典角色。對於無線的裁員行動，陳豪謂金融海嘯下他擔心的不只是公司，還有整個社會大氣候，他說：「我都有勸人暫時唔好掂股票，自己都有砸住6位數，而家大家共度時艱，工作減價都冇所謂，自己都有因應情況酬勞有加減，所以今年聖誕節唔會買貴嘢送畀人，廖碧兒唔喺香港，所以會send sms 。」談到續約藝員被凍薪，陳豪說：「我自己其實唔係好清楚成件事係點，不過如果冇人工加對我嚟講唔係好大問題，始終金融風暴大家都知影響力，即使叫我減少少人工，只要大家可以共度時艱，等到經濟好番，到時人工可以再向上調整。」同場的李詩韻對凍薪一事也未感愕然，她說：「冇所謂，對於我哋嚟講，收入來源都係接job ，就算減少少都冇所謂，最緊要係公司畀多啲曝光率我，努力接多啲job ，畀多啲劇我拍。」楊怡則透露因下月開新劇，故近日密密接job 狂搵真銀，她承認金融海嘯對接工作有影響，幸好她還算抵用，所以沒有被壓價，並自爆用30多萬買了架小跑車獎勵自己，下個目標就是買大屋給母親。對於藝員凍薪，她說：「呢個係一個大家要共度難關嘅時期，其實而家都好多公司唔加人工，所以問題都唔係好大，唔減就已經好好，大家一齊度過咗呢個難關先再算，呢個都係冇辦法之中嘅辦法，我哋做藝人惟有盡量去出面接多少少工作。」
日內與無線續約的薛家燕，成為首批被凍薪的藝員。
李詩韻自言不為凍薪一事感愕然。
「作為員工惟有接受」
鄭嘉穎昨日到沙田出席活動，對藝員凍薪表示無奈。
談到凍薪問題，王祖藍說：「我仲未收到任何消息，不過如果真嘅話都係行政上安排，佢哋行政上想點就點㗎喇，不過唔緊要啦！希望可以接出面嘅工作去補得番，而且今次成件事都唔只係一間公司嘅問題，係全香港嘅人都要面對嘅事，所以都係要順應安排。」此外，鄭嘉穎昨在電話中談到藝員凍薪時，他無奈地說：「睇大環境，唔止TVB 係咁，其他公司都有呢啲措施，全世界陷入經濟危機，呢個係公司決定，作為員工惟有接受，冇其他辦法。不過我又唔係太悲觀，因為香港經歷過金融風暴同沙士，相信呢啲日子好快過去。」被無線總經理陳志雲欽點到冰島拍攝《冰天動地》的陳鍵鋒，將於明年2月約滿無線，對於凍薪問題，他的經理人周小姐昨回應說：「佢請假請到明年3月，TVB 未同我哋傾續約，但之前佢都講過，喺金融海嘯下佢唔介意大家同度時艱。」採訪、攝影：王崇穎、駱華齡、楊潔雯
全城熱話思琦早續約有錢執
楊思琦
無線高層樂易玲昨日宣佈藝員續約時全部凍薪，不少藝員均表示已簽長約，相信影響不大，楊思琦則於月前剛與無線續約，避過凍薪命運。楊思琦：其實我比較好彩，兩個月前續咗新約，過時仲有人工加，加幅都好滿意，不過而家全球經濟咁差，經濟唔好我哋都少咗好多出面嘅工作，都會有影響。鍾嘉欣：我唔知呢件事，不過我份約都簽咗好幾年，數目已經定晒，所以暫時未有太大影響，不過其他藝員會好難避免，邊個都唔想，惟有大家慳啲使喇。徐子珊：對我影響唔會好大，因為我之前簽咗幾年約，不過近排聽到公司裁員嘅消息都好擔心，希望可以快啲度過呢個難關。陸詩韻：我本身簽長約都會有保障，而且我份約仲有幾年，都未係太擔心，大家都知全球氣氛都係咁，只可以共度難關，既然大家都係咁，反而唔會覺得點。湯盈盈：其實以而家嘅情況，公司唔減人工已經係對我哋好好，基本而家整體社會都已經係咁，所以我哋做藝人嘅，只可以喺出面接多少少
徐子珊
鍾嘉欣
楊怡昨日得知無線的凍薪計劃後，笑言不減人工已是萬幸。
