Gaile 話佢呢隻寶貝芝娃娃Phantom 只係傷風冇乜大礙，所以佢離開獸醫診所時都好輕鬆。
FBI 最鍾意見到有愛心嘅藝人，好似樂基兒（Gaile ）咁，上星期四（13日）FBI 就響跑馬地撞到佢左一袋右一抽帶住心愛嘅芝娃娃Phantom 同貓仔去睇醫生啦。睇獸醫其實冇乜特別，特別在Gaile 搵嘅呢間診所響跑馬地嘅何大成醫生係出名嘅獸醫，動物針灸都係佢首創，普通診症未計藥都收六百以上，傳聞仲唔收新症添。
愛心同錢係咪成正比FBI 就唔知，只見Gaile 嗰日孭住兩個狗袋竟然係大劉女友呂麗君近期至愛嘅妹味美國品牌Juicy Couture ，黑色袋要$3,000，白色嘅就要$2,300，你話Gaile 幾錫佢啲寶貝呢？
睇完醫生，Gaile 碌咭走人，成個人鬆晒，佢同FBI 講：「Phantom 有啲傷風感冒啫，隻貓只不過例行檢查。」咁有冇問吓佢哋鍾唔鍾意黎明幢上水新屋呀？陣間變咗「走佬芝娃娃」就大鑊啦！
Juicy Couture 黑色Pet Carrier$3,000
Juicy Couture 白色Pet Carrier$2,300
Gaile 拎住兩個Juicy Couture 寵物袋，白色裝貓貓，黑色裝狗狗，加埋已經5千幾蚊，好多OL 買手袋都唔使咁貴，真係做狗好過做人。
