現年卅九歲嘅伊能靜，○○年以「庾太」身份，又趴又夾胸拍攝寫真集《情人》，雖然三點「不」露，但當年惹來唔少回響，其後庾太更經常谷咪咪行性感路線。
上個禮拜兩大台灣新聞焦點，除咗「2630」陳水扁被關押，仲有伊能靜喺北京拖住黃維德行街嘅偷情寫真。
伊、黃有「景轟」傳足兩年多，今次有圖為證水洗唔清，努力經營賢妻良母形象嘅伊能靜，變成背夫勾佬世紀淫婦，更被轟掩飾偷情大話演技，拍得住嗱「奧斯卡」嘅陳水扁家族成員。
事件爆煲後，哈林庾澄慶強調「沒離婚、沒分居」；至於唔敢見人嘅伊能靜，就不斷有風聲傳出，指佢同哈林已分居多時，差在未簽字離婚。但問題係，全台灣娛樂圈都知，黃維德有個拍拖十八年圈外女友，更盛傳二人已秘密結婚兼育有一女，就算「庾太」背夫偷食罪名不成立，家陣涉嫌破壞人哋家庭幸福，你估個個都係甘比咩！
傳言四起
現時外間流傳多個有關哈林同伊能靜嘅婚姻狀況版本，有指伊能靜因為唔捨得仔仔「小哈利」，堅持分居不離婚釀成今日大錯；另有版本指哈林「不只一次」主動提出離婚，但居然向外界辯稱與老婆「沒離婚、沒分居」，令伊能靜受盡委屈，事關兩夫婦早於三年前已經分開生活。
家家有本難唸的經，傳聞真與假，始終不敵一張鐵證如山嘅偷情拖手照，伊能靜與黃維德傳足兩年多嘅緋聞，終於有聲兼有畫，據聞伊能靜因為呢件事，喊到幾近崩潰，更私下同朋友講，與哈林婚變跟第三者無關，即使沒有黃維德，都可能有第二個。
就係呢幾格同黃維德嘅北京拖手照，伊能靜代言嘅護膚品廣告即時被飛，何止金錢損失，中、台兩地網友每日喺佢個blog 「洗版」，留言鬧伊能靜對唔住哈林。
敬業樂業
對於種種傳言，伊能靜經理人公司透過網上日誌澄清，一切有關兩人婚姻嘅新聞全屬流言，現在與未來伊能靜唔會作任何回應，未來一切回應以庾澄慶先生發表為準。
老婆「
縮」，疑似戴綠帽嘅哈林，喺東窗事發第二日（十一月十一日）勇敢面對傳媒回應事件，但就一反平日力撐老婆嘅態度：「我的心情還OK ，報導、網絡我都不看，但大概了解狀況，我想這事要好好想想，研究後才告訴大家，我們沒離婚、沒分居。」
講完短短幾句交代說話，哈林馬上入廠錄影節目，更發揮平日嘅搞笑本色。當日，電視台刻意加強保安，阻止記者騷擾哈林，當佢錄完節目，亦第一時間離開電視台。
哈林經理人孟美瑛表示，哈林明知改期錄影會影響好多人，佢寧願選擇直接面對：「他就是這麼敬業的人，現在發生這種事情還要錄影，我們很心痛！」
男人最痛……算這種！（設計對白）
11/11
老婆勾佬玩「
縮」，哈林被迫面對傳媒交代綠帽事件，當日佢做節目時依舊搞笑投入，但見到記者全程苦口苦面笑唔出。
千依百順
由拍拖到結婚加埋21年，哈林與伊能靜一直係圈中模範夫婦，經理人孟美瑛坦言對事件相當震驚：「哈林幾乎天天打電話給老婆噓寒問暖，庾媽媽對伊能靜也很好。」
兩公婆嘅閨中密友金瑞瑤近日亦開腔力撐：「不到一個月前，我和他們一家三口吃飯，看不到任何異狀啊！（黃維德拖手）會不會是誤會呢？」
經理人、好友開口撐，但庾氏夫婦呢幾年一直有婚姻告急傳言，矛頭全部指向伊能靜一個。
有傳思想傳統嘅庾老太，一直唔明點解阿仔要娶個「歌女」，婆媳之間向來無兩句，做夾心人嘅哈林同樣唔好受。
而喺三年前，伊能靜唔理老公反對堅持到大陸發展，兩夫婦聚少離多，同時伊能靜亦傳出與台灣小生黃維德緋聞，哈林當然信老婆清白，還多次公開力撐，叫記者唔好作古仔。
伊能靜每次shopping ，莫講話個仔，連阿媽姓乜都唔記得，由得「小哈利」四圍走，反而哈林湊仔寸步不離，耐心地教仔仔揀選玩具。
童言無忌
老婆遠走高飛，變成湊仔公嘅哈林，每日身兼母職，工作點忙都會儘量抽時間接送仔仔「小哈利」返學放學，更會趁假期，兩父子一齊上京探媽咪。
至於耐不耐先返台灣湊仔嘅伊能靜，不只一次被記者目擊雙眼只係顧住睇靚衫shopping ，由得個仔坐埋一邊打遊戲機，歷時幾個鐘都試過。
最離譜一次，係小哈利喺梳化跌咗落地仆崩牙，雖然唔係墮樓或者爬水渠去咗隔籬屋咁大件事，伊能靜亦難辭其咎，據聞當時小哈利同媽咪講：「如果跟爸爸在一起，就不會這樣。」你係阿媽聽到個仔咁講，會有咩feeling 呢呵？
07年
緋聞男女去年在國內一齊出席廣告宣傳，兩個不避嫌玩合照，而伊能靜曾為呢段緋聞作出以下回應：「我愛跟誰在一起就跟誰在一起。」更試過控告國內報章誣衊佢婚姻破裂消息，逼媒體炒記者魷魚，勁！
全城熱踩
不守婦道疏忽湊仔，伊能靜賢妻良母形象一鋪清袋，加上疑似「姦夫」嘅黃維德，近日被踢爆同拍拖18年嘅圈外女友陸薇雯（小陸）秘密結婚兼生埋女，伊能靜罪加一等。
為咗同小陸「箍煲」，據聞原本身在大陸拍劇嘅黃維德，漏夜飛返台灣向大婆自首，但氣難下嘅小陸，完全唔接受黃維德所講，「是伊能靜手伸過來」嘅解釋，更反拗話：「那你應該要抓嗎？」
小陸曾經向同事投訴，覺得黃維德大話連篇：「我跟他說，今天你們兩個不避嫌，才會搞成這樣，他說，伊能靜跟他弟弟（藝人黃維倫）也是這樣打打鬧鬧的，他說他不喜歡伊能靜，跟一般朋友一樣，那為什麼要大手包小手呢？」
對朋友力數負心漢，但記者搵小陸回應事件，則封嘴兼嗌報警。
與黃維德緋聞愈傳愈盛，但當事人一直闊佬懶理，更簽約同一個國內經理人公司，經常奉旨孖住拍劇，但亦有傳言指，伊能靜真正溫心老契係國內一名地產大亨，兩人秘密交往一年有多。
黃維德與小陸拍拖十八年，雖然女友唔及人妻咁銷魂，但有傳兩人早已秘密結婚。
張宇同哈林相識十幾年，因為衰多口叫哈林睇實老婆，導致二人反面收場，好心無好報。圖右為劉德華，二人在台灣出席《快樂星期天》節目。
過度溺愛
外間認為，哈林多年來太過痛錫遷就老婆種下今日禍根。過往，哈林亦承認自己怕老婆，名下多個位於台灣、上海、北京等地物業，全歸伊能靜名下：「我是『PTT』（怕太太）俱樂部成員，說我怕老婆也行，反正是事實。」
對於伊能靜能唱能演又會寫書，哈林曾晒命話自己有個叻老婆：「伊能靜當初唱《流浪的小孩》，以她一個偶像歌手，專輯賣80萬張，很了不起。」
完全零緋聞嘅哈林，反而伊能靜除咗黃維德，與歌手高明駿以及侯孝賢都傳過緋聞，更多次俾記者影到同男伴食飯唱K ，但每次哈林都會話「他們是gay 呀！」幫老婆解畫。
老婆永遠是對的，哈林十多年好友張宇，因為睇唔過眼提醒佢「多注意伊能靜在外的行為」，哈林聽到居然老羞成怒，仲同張宇反晒面。
呢幾日閉關避世嘅哈林，據聞忍唔住喺屋企流下綠帽男兒淚，男人最痛，莫過於此。
（《忽然1周》圖片）
廿一年情路
「哈伊戀」萌芽初期，因年齡相差八年被外界看淡，直至二人結婚生仔，終成為圈中令人羨慕嘅模範夫婦，哈林愛妻表現，更是台灣少女心目中最佳老公。
1987年
十八歲嘅伊能靜以少女組合「飛鷹三姝」出道，跟同樣係樂壇初哥、廿六歲嘅哈林相識，繼而秘密拍拖。
2000年2月
結束十二年愛情長跑，於美國洛杉磯註冊結婚。
2002年3月
結婚初期，伊能靜曾抱怨唔慣婚姻生活，但02年仍為哈林誕下麟兒「小哈利」。
2003年6月
發揮才女本色，為老公新歌《春泥》填詞，更在新書《生死遺言》中向哈林隔空示愛：「我對著天發誓，在我有生之年，我一定要比你多活一天，我會幫你安葬，讓你安心，不受失去的苦痛，然後我再陪伴你。」
2006年7月
女方緋聞滿天飛，哈林全投信任票，更為拉近兩公婆年齡距離，哈林男人老狗居然去拉面皮回春。
2007年6月
再傳婚姻亮紅燈，有指伊能靜長居上海，唔願返台灣見哈林。
國台扮
