為紀念黃霑逝世四周年，黎文卓請咗好多位書法家以霑叔嘅經典歌詞嚟寫書法，噚日喺九龍灣舉行「黃霑經典歌詞書法展」，由霑叔個女黃宇詩、生前好友顧嘉煇、倪匡、曾華倩同丘亞葵主持剪綵，不過名單上有份嘅呂方就突然缺席。
顧家煇話冇咗黃霑（小圖），有煇冇黃，開演唱會都冇意思，真係欷歔。
書法展會場展出好多書法名家嘅墨寶，所寫嘅仲係大家耳熟能詳嘅經典歌詞，真係幾有意思。
倪匡最愛《問我》
倪匡同黃霑咁老友，對世姪女黃宇詩特別親切。
呂方經理人丘亞葵話自從呂方同鄭裕玲分手後，一直有唔少負面報道，可能呂方驚咗所以唔想見人，不過而家呂方心情都好番啲，問佢嚟緊工作安排？佢話呂方想喺內地發展，原先想喺鄉下南京開始，但係安排比較難所以改喺北京。至於黃宇詩就話唔排除爸爸逝世5周年會有特別活動，其實喺爸爸生前已經想搞，呢個係情意結，不過仍然覺得自己未夠成熟，希望爸爸逝世10年內會搞到呢個計劃。而煇哥就話最近肥咗，問佢會唔會再搞演唱會？煇哥講而家有煇冇黃，好孤獨唔會搞啦，不過如果宇詩有乜嘢需要都幫手。另外倪匡對霑叔嘅懷念都係盡在不言中，佢話向來唔識欣賞音樂，但第一次聽到《問我》首歌就好鍾意，所以咁樣識到霑叔。
呂方自從同鄭裕玲甩拖之後，成為傳媒追訪嘅對象，仲傳出好多負面新聞，難怪佢唔想見人啦！ 資料圖片
