劉鎮偉原本今年想再開拍電影《西遊記》，實行同周星馳打對台，但因為好多技術問題未解決，所以決定擱置落嚟，先搞中國版《變形金剛》，片名暫定為《機器俠》，《機器俠》主角由方力申擔任，其他機械人分別由鄭中基、胡軍同吳京等人演出。女主角係曾同黃曉明合演劇集《新上海灘》嘅內地女星孫儷，鄧麗欣（Stephy ）就會客串一角。
內地電視一姐孫儷擔任女主角，選角都幾新鮮。資料圖片
劉鎮偉執導嘅中國版《變形金剛》，會加重講情，唔會齋打咁悶。
重中國色彩
呢部戲月底就開拍，主要喺寧波同上海拍攝，預計出年暑假上映，部戲會有好多特技，除咗香港先濤會幫手搞部戲嘅特技外，仲會喺荷李活搵人做特技，雖然呢部戲以科幻特技為主，但劉鎮偉會加番重講情嘅部份，唔會機械人齋打咁悶。部戲投資約五千萬，資金主要來自內地片商，由於係中國版機械人片，製造出嚟嘅機械人會好重中國色彩，等觀眾睇時有啲新鮮感。此外，方力申、吳京同黃柏高噚日接受商台電話訪問，方力申早前拍攝電影《狼牙》，佢喺戲中一改斯文形象，化身打仔，佢話拍攝時吳京要求好高：「吳京要我一氣呵成做啲扭同踢腳嘅動作，我要連拍32個take 先成功，覺得仲辛苦過當年游水，令我好有挫敗感。」
方力申同鄭中基（左）一向有默契，今次合作拍攝電影《機器俠》，唔知又會有乜新火花呢？資料圖片
