康仔尾場騷冧完阿媽冧女友
蘇永康前晚在Star Hall 舉行最後一場演唱會，大批圈中好友前來捧場打氣，其母及女友Anita 均現身支持，尾聲時觀眾湧到台前，不少女fans 熱情熊抱康仔，康仔不怕女友呷醋來者不拒，事後出言狂冧女友，表示真愛難求，即使只是拖手已經足夠，一切都盡在不言中。
闊別香港舞台6年的蘇永康，前晚在九展Star Hall 完成最後一場演唱會，不少圈中好友如梁漢文（Edmond ）、劉浩龍、歐陽震華夫婦、呂頌賢及女友麥景婷、張文慈、周麗淇及周汶錡等也有捧場，康仔媽咪和女友Anita 更睇足全場。
蘇永康女友Anita 前晚再出現捧場。
康仔媽咪看乖仔演出，面對鏡頭露出四萬笑容。
任攬唔嬲
周麗淇（左）忘記情傷和家姐周汶錡結伴欣賞康仔演唱會。
康仔談到拍拖四部曲，分別是拖手、擁抱、接吻及深入了解，他說：「18歲時敢去做第一、二同三部，四就唔敢諗，怕有其他步驟要跟，大家成年人，唔使我畫出腸。但當我28歲時你又估我點揀？」台下的Edmond 和劉浩龍大叫：「四呀！」康仔聞言笑說：「我係會揀四，點呀！不過而家再問我，我只會揀一，剩餘過啲有冇都冇所謂，我唔望有夢中情人，只想有紅顏知己。」當晚反應熱烈，安哥三次，康仔更乘機冧阿媽說：「如果有辭典，有奉陪到底呢四個字，側邊一定有媽咪個樣，因為佢乜情況都撐我。」說到此時康仔眼濕濕，再唱出一曲《男人不該讓女人流淚》。尾聲時不少觀眾走到台前和康仔握手，更有女fans 送上擁抱，康仔來者不拒，但曾有保安阻止，康仔笑稱：「由得佢，冇乜機會。」
拖手到老
在慶功宴上，康仔女友Anita 亦有到場，不過就坐在貴賓房內。問到為何不在台上公開多謝女友？康仔說：「呢啲在心中，唔使一定講出嚟先明。」至於是否已視女友為家人？康仔表示不願再講，又稱已經憑歌寄意。現階段是否和女友拖手已經足夠？康仔說：「哈哈，以前年少輕狂，而家拖手已經足夠，可以last 得耐啲。」
吳雨霏前晚再次擔任康仔演唱會嘉賓，兩人表現越見合拍。
