喺北京 奧運 開幕表演上演出《歌唱祖國》，憑着一副可愛臉孔而一夜走紅嘅9歲北京女孩林妙可，噚日嚟咗香港一個商場表演。當日被傳媒踢爆天籟歌聲原來係由7歲女孩楊沛宜幕後「咪嘴」，但今次小妙可絕不怯場，以「真人發聲」即場獻唱《Jingle Bell》同《我和你》，唱歌時一直都保持甜美嘅笑容，唔少現場觀眾都大讚佢可愛又淡定，雖然有人覺得「奧運把聲唱得好聽啲」，不過妙可咁可愛，就算唱歌唔聽得，都一定睇得！
穿上純白色裙嘅小妙可，人如其名夠晒可愛，一出場全場鎂光燈就閃個不停，而小妙可亦好識做，行起catwalk時左扭右扭，擺出好多「甫士」，任影唔嬲，又向現場觀眾不斷打招呼。大會主持人喺台上問妙可對香港嘅感覺，佢話今次特別開心，又話奧運開幕表演時一啲都唔緊張，而長大後嘅志願係要做醫生，幫身邊嘅人醫病。
台上對答自如台下「封嘴」
不過，一落到台，記者想搵妙可傾偈，佢望咗望經理人，就即刻知道要「封嘴」，連半句都唔講，妙可真係又乖又聽話！
如果您喜歡這篇文章，請按「讚」或分享給您的朋友，以示鼓勵。
