仲捉你哋唔到？拍拖唔炒得唔得呀？
金融海嘯人人自危，打工仔個個都打醒十二分精神工作，唔係年尾被人裁咗就真係喊都無謂！偏偏做採購文員嘅讀者Yuki 跟同組同事撻喺，為免被同事及上司覺得他倆會相互偏私、工作分心之嫌，二人拍拖拍得鬼鬼祟祟，但最後都給上司撞破。究竟辦公室戀愛，是否真的會阻礙工作、威脅飯碗？如何能減低上司以及同事的誤解，避免炒魷風險？
辦公室ER ：
你好！我叫Yuki ，在禮品貿易公司做採購文員約1年半，最近公司內部盛傳會喺年底裁員。我同同組同事P 君地下情半年，平時已經盡量避忌，但前幾日P 君情到濃時，喺茶水間忍唔住拖住我隻手，竟被老闆撞到正！我好驚老細會因為咁將我或者P 君裁走。我同男友都唔想冇咗份工，可以點樣做呢？
Yuki 上
上司最忌 小圈子
公開大學心理學講師萬家輝對於Yuki 這個個案，坦言十分難搞，因為即使再開明的老闆，心底亦最忌下屬搞小圈子。「令到上司介意嘅，應該唔係Yuki 二人會因拍拖冇心機做嘢，反而驚佢哋兩個組成一個小圈子，再影響其他人做嘢或者想法。」他又補充，同公司兼同組，工作上的確有利益衝突之嫌，這些主觀因素已經形成，二人不想被炒，可試試下列幾點，以沖淡上司同事對二人相戀的負面印象。
1.自動「拆堆」
舉例講一組有5個人，如P 君與其中兩位同事較熟，Yuki 應該主動避開該2位同事，寧願與其餘1位同事傾偈食飯。此舉雖然有「搞分化」之嫌，但總好過給該組3名同事「你兩個打龍通搞聯盟」。
2.公司範圍忌親熱
絕對嚴禁喺公司打情
俏、拉手拉腳，不同組可盡量避免接觸。但如果好似Yuki 咁共處一組，有工作資料要互通的話就要在大庭廣眾地方處理。
3.拍拖不談公事
別以為放工後即擁有「絕對自由」，聽得多戀人對某同事的感覺，不知不覺會入腦受影響，對該同事做成偏見。
半島青年商會主席施德利先生，平時接觸不少老闆級朋友，他說這些老細，有八成都說不愛員工搞辦公室戀愛，只有兩成回應「冇所謂」。絕對冇人表達過「支持」。「最大原因係怕一pair 戀人將情緒帶到工作上，例如甜蜜時掛住拍拖早走人，鬧交時分心跌watt ，所以大前提都要先做好工作，私人嘢唔好喺工作環境張揚，keep 住工作幹勁完成任務，基本上老闆都會隻眼開隻眼閉嘅！」施先生又提醒，同一組嘅辦公室戀人，最好唔好一齊嗱超過7日嘅長假，要其他同事同時負擔兩個人嘅工作量，冇怨言至奇啦！
