天氣一轉涼，有火鍋的食肆就爆晒棚！
多得金融海嘯，成千蚊打一次A6和牛邊爐相信今年已成絕響。不過時勢唔好亦可窮風流，去快餐店打幾十蚊的一人火鍋，亦一樣滋味。
以酒樓做主打的稻香集團今年亦加入戰團，大搞一人火鍋店，半隻雞連湯底都係48蚊，實行同各大快餐店鬥平鬥抵食。
我哋冒住爆瘡同喉嚨痛的風險，試勻當今最hit 五大快餐式火鍋，睇啱心水就快啲call 班friend 去霸位。
今次比併有4項評分標準：
1火鍋湯底、2火鍋配料、3火鍋快滾度、4加水殷勤度，
以★★★★★為滿分。
新開的火鍋店HIPOT 裝修比一般快餐店落本，吸引不少年輕人幫襯。
HIPOT 酒樓質素快餐店價錢
HIPOT 是稻香集團旗下最新的火鍋店，主打年輕人路線，一人一鍋，雖然招呼同酒樓一樣，但係免收加一同茶芥，同快餐店冇分別。不過佢嘅裝修比快餐店靚好多，座位亦闊落，最正係有個免費醬料區，辣椒豉油、金蒜、沙茶醬等任拎，最啱鍾意混醬嘅人。
一人鍋晚餐要$98，比一般快餐店略貴。但另一個相撲鍋有半隻雞、露筍、姬松茸、牛蒡、冬筍同埋南瓜片，賣相精緻，連埋大大鍋湯底都係$48，必食推介。
晚市一人前火鍋餐 $98
最多人點的火鍋餐，有齊牛肉、羊肉、貢丸、水餃、滑雞、劍魚腩、蟹柳、鳴門卷、翠玉瓜、冬菇、金菇同生菜，用料非常新鮮。
相撲鍋 $48
睇相就知有幾抵，湯底是高湯，香到攝影師都忍唔住問：「香成咁，係咩特別湯底？」雞就非常滑，一個女仔幾乎食唔晒成窩。
忽周評
一人前火鍋餐
火鍋湯底 ★★★
南瓜洋
忌廉湯較濃，不是人人喜歡，但就非常滑溜，充滿南瓜茸的香味。
火鍋配料 ★★★★
特別一讚是羊肉同水餃，前者嫩而不羶，甚有正宗北方羊肉的風味；後者的餡料不單有普通的蝦肉和豬肉，仲加入雜菇，味道清新。
火鍋快滾度 ★★★★★
用小型電磁爐，不用一分鐘湯底已滾起，仲可以自行調校火力。
加水殷勤度 ★★★★★
阿姐得閒就會自動過來加水，服務一流。
地址：觀塘apm L6-3
電話：31481313
日式牛肉火鍋$48
吉野家 湯底取勝
去年冬天我幾乎每個星期都吃一次吉野家火鍋，為的是火鍋內吸滿濃湯的烏冬。今年吉野家和往年一樣推出牛肉火鍋，配上各式蔬菜，配料、味道不變，但賣相就稍遜了。原本排得像日式鍋物般漂亮的鍋底變成材料亂放，該放最底的烏冬卻放了在鍋面，印象分大減。
忽周評
火鍋湯底 ★★★★★
香濃而帶點蔬菜清甜的湯底是這個鍋的靈魂，令最普通的配料都變得極為可口，是眾多快餐式火鍋中最好的。
火鍋配料 ★★
有牛肉、鳴門卷、油揚豆腐、芋絲、鮮冬菇、秀珍菇、金菇、娃娃菜、紅蘿蔔、豆腐、烏冬。牛肉的油膏是粉紅色的，不算上等貨色，食落油香微弱，幸好分量夠多（有6片），並附送芝麻醬提升味道。不過有「俾漏嘢」情況，少了我最愛的油揚豆腐和芋絲。
火鍋快滾度 ★
好慢，鍋底端上來時只是半熱，靠酒精爐約5分鐘才微滾。
加水殷勤度 ★
不見有加水服務，可幸火力很弱，食晒成鍋都未乾水。
ShabuShabu 和味火鍋
$52-54
美心MX 夠晒大堆頭
一向覺得美心MX 的食物質素不輸蝕於同類快餐店，店面亦光猛過人。今年佢哋主打的「ShabuShabu 和味火鍋」同正宗的ShabuShabu 有一段距離，但勝在用料夠多，尤其蔬菜類多到滿瀉咁滯，真係食菜都食飽，好味又健康。雖然肉類分量不及蔬菜多，但都唔少，我叫咗個最多嘢食的6併火鍋，用咗個半鐘先食得晒。
忽周評
火鍋湯底 ★★★★
日本原裝進口「北海道牛乳」配南瓜茸湯底比想像中好，鍋底翻滾出牛奶的香味。值得一讚的是南瓜茸分開上，可以隨個人喜好落多落少。
火鍋配料 ★★★★
配料質素冇得彈，但有「俾漏嘢」的情況，少了獅子狗魚蛋。6併配料有美國穀飼牛、蟹籽蝦滑、豚肉、清酒醉雞、鮮蝦、鮮吊筒、鳴門卷、獅子狗魚蛋、冬菇、蓮藕、金菇、南瓜、小棠菜、唐生菜。牛肉口感最好，入口有點油香，豚肉亦非常脆嫩，令人驚喜。蟹籽蝦滑則保持往年水準。
火鍋快滾度 ★★★
鍋底端來時已非常熱，2分多鐘就開始滾。
加水殷勤度 ★
阿姐要叫才會來加水。
一哥私房火鍋（東星斑‧美國特級雪花肥牛）$59
大家樂 手打肉丸超好食
今年大家樂以東星斑作招徠，推出東星斑肥牛火鍋，連個配料盆都由火鍋船改成日式盛合，配料分量唔算多，但一個女仔夠晒飽。火鍋賣相同廣告相差極遠，基本上聯想唔到係同一樣嘢。值得一讚係配料花款最多，有4種不同主題，包括羊腩肉、手打肉丸、花蝦海中寶同東星斑，梗有一款啱你。
忽周評
火鍋湯底 ★★
明明要香茜皮蛋窩，卻來了一個鴛鴦鍋，不過兩個鍋底味道基本上是一樣的，都是略淡。
火鍋配料 ★★★★
廣告上牛肉排得滿滿，實物就只得3片，不過非常好吃，亦切得比其他店厚，而且有濃郁的牛味和油香。手打肉丸也一絕，手打豬肉丸配上冬菇，鮮嫩多汁，機打貢丸難以相題並論。反而東星斑頗腥。其他配料有蝦滑、枝竹、金菇、娃娃菜、小棠菜、粟米、冬菇、車厘茄和米線。
火鍋快滾度 ★★★★
好快！分幾鐘就滾起。
加水殷勤度 ★★★★
阿姐有主動問需不需要加水。
「牛鍋王」配大豆芽魚湯$47
大快活 街坊風味
相比其他快餐店，大快活的配料真係非常街坊，有牛肉、滑雞、魚蛋、魚片頭、生根、枝竹、娃娃菜、烏冬同粉絲，全部都是大牌檔feel 的平民食物。如果你喜歡街坊風味的話，一定啱晒你！
忽周評
火鍋湯底 ★★★
不太覺得有魚味，不過頗清甜。
火鍋配料 ★★★
標榜是「即切肥牛」，可是沒有太大驚喜，牛肉肥膏特別多，但牛味不太濃，肥膏只令牛肉吃起來軟滑一點，反而魚蛋和魚片頭很彈牙。
火鍋快滾度 ★★★★
今年的火鍋爐改成3頭酒精爐，火力非常足，1分多鐘就滾起，即使加料也很快再翻滾。
加水殷勤度 ★★
快要吃完乾塘時，才有人問要不要加水。
在大快活見到有人做了記者一直很想做的事──帶自己的配料打快餐店火鍋！阿Ken 和朋友帶來私伙牛丸，明顯是快餐店火鍋達人，阿Ken 話：「唔夠食嘛！呢度勝在火力猛，又可以打幾耐都得。個鍋啲嘢食都OK ，最正係嗰啲豉油，校得好好味！」
