月初大家樂被踢爆逆巿加價，中大經濟系副教授關焯照狠批偷雞加價，真係大快人心。佢嘅競爭對手大快活就話，喺家吓咁嘅時勢公司冇考慮加價。小妹都好佩服大快活好有大企業道德良心。點知有網友小陳唔抵得大快活擘大眼講大話，Send 個email 嚟畀小妹報料，不滿大快活話目前唔會考慮加價，因為佢仲早過大家樂，喺10月部份早餐已經加價。佢舉例話，喺數個月前大快活嘅早晨糯米雞餐，已由原價嘅20蚊，加到21.5蚊，上月再加到22蚊添。
公關部與分店口徑不一
吓，咁都得，靜雞雞加咗價，傳媒問到就扮偉大咁講暫時冇考慮加價。小妹嬲嬲地咪打去多間嘅大快活分店問吓啲早餐係咪加咗價。好在啲職員都好誠實，承認上月早餐加咗價，除咗糯米雞餐加咗五毫子之外，一啲西式扒類早餐仲加咗一蚊添。小妹咪打電話去大快活公關部求證，公關姐姐話近期冇加過價。小妹即刻話問過幾間大快活分店，啲職員都話加咗價。佢反應好快話，總公司冇加價，可能個別分店調整價格。佢仲問埋邊幾間分店加價添。之後，佢又打番畀小妹，解釋係啲職員記錯咗，唔係上個月加價，而係年中加價。吓，咁都得！如果公關姐姐回應屬實，佢哋啲職員記性都好有問題，年中加咗價，個個都記錯咗上月加價。中大巿場學系教授冼日明話，巿民消費要精明啲，認清邊啲餐廳加價，先至考慮幫唔幫襯。電郵：mailto:shoppingjing@appledaily.com逢周六、周日刊出
姓名：Shopping 精性別：女年齡：年年24歲興趣：行街買嘢、吃喝玩樂、做高溫瑜伽
