去年天水圍千人排隊應徵遊戲展做臨時工，今年再接再厲再益天水圍居民，再請150人。
記得去年年底，亞洲遊戲展破天荒到天水圍搞招聘會，專請該區100多人做遊戲推廣臨時工，結果超過1,000人排隊，出現超級人龍。
雖然而家唔好景，但遊戲展仍然要搞，負責亞洲遊戲展推廣嘅項明生先生，就話今年一樣會專請天水圍居民，仲加咗碼有成百五個空缺，照舊有專車接送員工返工放工兼送埋午餐，仲多咗免費職前培訓，同上年一樣，喺遊戲展做得好嘅臨時工，就有機會成為長工。
亞洲遊戲展招聘日
時間：11月30日（暫定10:30am 起）
地點：天水圍（天水圍嘉湖山莊對面公園）
招聘職位及職責：遊戲推廣員，負責介紹各種遊戲，維持會場秩序。
招聘名額：約150個
時薪：$35
查詢網址：
http://www.asiagameshow.com
阿兒（紅圈所示）去年參加亞洲遊戲展，表現勤奮上進得SCEH 賞識，現時已獲該公司聘用為全職遊戲推廣員。
做得好變長工
項明生話佢對遊戲娛樂事業抱樂觀態度：「面對市道吹冷風，上個月生意額雖然下跌20%，但因為係香港旅遊淡季，遊客少咗嚟香港買game 所致。而且打機正係減壓嘅平靚正好方法，我哋反而積極推廣業務，更加需要人才，喺遊戲展發掘人手，正係一個好渠道。」
上年喺遊戲展成功被聘請為長工嘅阿兒，現時係SCEH 機場全職遊戲推廣員，月薪約$7,000，仲有車費津貼。項明生讚佢喺去年遊戲展表現積極，「佢好有耐心咁同嘅唔明點樣操作遊戲嘅參觀者作說明，又成日笑容滿面，好難得。」阿兒十分高興說﹕「我做亞洲遊戲展之前，成三個月搵唔到工，好多老闆一聽我住天水圍，可能驚我車程遠易遲到，見完工都冇晒影。所以SCEH 肯入嚟天水圍特登搵我哋，係一個好大嘅鼓舞，我希望將來可以做到推廣主任啦。」
同上年一樣，只要係16歲或以上香港永久居民就有機會獲聘，不過大部分都會請青少年。面試後約7個工作天就有專人通知受取錄嘅員工。工作範圍則係負責推廣遊戲、維持會場基本秩序、示範遊戲工作等，獲聘員工做足4日遊戲展，每日做8至10小時嘅話，最多可獲$1,400，今年仲會喺12月19日至22日亞洲遊戲展之前，於天水圍舉行職前培訓（地點未定），教導基本推廣禮儀，以及基礎接待英語及普通話，年輕人當去學嘢都好呀。
PROFILE
發錢韓，本身姓韓，由於見錢眼開的性格，所以朋友均稱呼他發錢韓。百足咁多爪，平時鍾意四圍八，與不同行業人士吹水收風，了解香港商機走勢。
