LG Viewty 明明有自己的專用介面，今次被人搞到變做Samsung F488介面，實在係大整蠱。
上流社會多戀事，搞到大劉要企出嚟認親生女，好睇過扮上流嘅《珠光寶氣》。
下流先達最近一樣有認生父事件，睇睇張大相，左邊LG Viewty （KU990）同右邊Samsung F488，何解兩部機居然係同一個操作介面？究竟係LG 同Samsung 打亂種，定係有人狸貓換太子？等電機兒八吓呢件不道德「配種」事件先！
邊部機至係親生㗎？設計對白
Viewty 漏洞被破
先達改手機不嬲多鬼嘢，今次將部LG Viewty 換做Samsung F488餡，好多人都以為係改咗部機嘅firmware ，其實係因為Viewty 以flash 作為介面，仲可以用程式改寫介面，有人利用呢個小漏洞，就用flash 模擬其他手機嘅介面，將呢啲自製嘅flash 放落Viewty 當theme 用！原理同過程極為簡單，難怪先達有鋪可以話15分鐘快速改機啦！無良改機鋪仲口聲聲話$200改機唔會影響原廠保養，實情係改theme 根本同保養無關，只係巧立名目乘機呃人！
改完之後按兩下C 就可以揀F488介面用，就連搬功能列嘅圖示落桌面都做到，並唔係得個樣喎！
仲可以改埋做iPhone 介面？其實係大陸機扮iPhone 的介面，但連待機嘅解除鎖定畫面都跟到足，勁癲！
變身iPhone 都得？
既然Viewty 係用flash ，即係變身成乜介面都可以，所以無良先達人就將F488或其他手機介面抄出嚟，再裝入Viewty ，目前以F488及大陸機扮iPhone 的介面最順利植入Viewty 內。雖然介面移植成功，但硬體應用則不變，例如500萬像素鏡頭唔會因為扮iPhone而降落200萬像素。
Viewty 改Vs 正版F488
Viewty 原來的純flash 介面，一直被人話樣衰，icon 仲幾簡陋。
一改即變
速機
由於呢個介面係硬加落去，所以運行時唔係太順，特別係拖拉圖示嘅時候會窒吓窒吓，而且改完之後亦只係外觀唔同咗，功能冇多到，同本來部Viewty 係完全一樣，咁改完有咩分別呢？
影相介面
一使用相機就現形，Viewty 仍然用番原有的相機介面，同原裝F488的相機介面不同。
撥號介面
打電話嘅介面就最為神似，不過Viewty 中間就變咗做「Call 」，而唔係F488嘅「清除」囉。
短訊介面
由於Viewty 個芒比較大，短訊介面反而可以一次show 晒啲選項出嚟，呢樣嘢連F488都唔及佢。
網上自製改頭換面
先達改機鋪幾下手腳就收錢「坤」水，仲扮嘢話係改firmware 呃啲無知顧客，其實只要安裝一個EFS MEDIA BUILDER 嘅軟件就可以隨意改變手機內嘅flash ，而且仲有唔同主題可以換，唔使crack 又唔使解SIM 就用得，一上網搵已經大把人教你點改，簡單到極，使鬼去先達等15分鐘，自己整仲快！
上google 一打「KU990變F488」已經有好多網站，呢個網仲勁到有齊教學同埋定期更新添！
LG ︰「會保留追究權利！」
今次LG 被人改用死對頭Samsung 嘅介面，條氣當然唔順啦，打去LG 以為佢哋會勁嬲，點知公關小姐勁開心，話係Viewty 受歡迎先有人改，但講到有人乘機呃錢就即時嚴肅晒︰「關於自行修改KU990介面，我們並不建議顧客安裝這些自製軟件，因為它們可能會影響產品的正常運作。此外，對於把自行修改的KU990介面用作商業用途一事，我們則會保留追究權利！」至於Samsung 公關則對改機事件闊佬懶理，仲話唔關佢哋事，所以不作回應！
梁永鏗律師：「一抄就侵權！」
咁樣移植介面，到底會唔會侵犯版權呢？梁律師就話：「即使改完功能冇變，亦冇作非法用途，但其實由抄走或模仿Samsung 介面的一刻開始，已經係侵權行為，因為本來要錢買機先有嘅介面，而家解出嚟用落其他手機就梗係唔得啦！」
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
[
本帖最後由 young 於 2008-11-13 12:04 編輯 ]
