多個地方賣，梗係好好多啦！真實對白
今年8月金牌收購大中華區EMI ，改名為金牌大風，老闆Paco 黃柏高更高調話重金3,000萬同一哥古巨基續約4年，算係近排樂壇少少曙光。
不過據知兩個月前，金牌與大型連鎖唱片店HMV ，因拆賬問題，金牌不滿HMV 大咬分4成，雙方反枱，全線HMV 即時抽起金牌旗下唱片。冇咗個大碼頭，賣碟少個門路，金牌一哥古巨基亦牙痛咁聲：「多個地方賣碟，梗係好好多啦！」
再唔拆掂，盞俾藉口歌迷非法下載，到時鞠躬一百次都唔掂！
金融海嘯影響，金牌旗下歌手方力申、傅穎和鄧麗欣等，曾向傳媒透露會自減歌酬，甚至自行化妝做慳星救市，只望減低開支接多啲騷，保住飯碗。
古巨基新碟《Guitar Fever 》據稱賣到白金數字（三萬張），不過若有HMV 谷一谷，可能銷量會更好，而家被迫陪葬，真係唔抵呀！
張敬軒「我一隻碟先分得個幾，咁少錢唔擔心分賬數目有變會影響自己收入喎！」
孫耀威「我公司真金白銀買位，個位梗好啦，我唔知HMV 冇賣金牌碟喎，因為我淨係買外國碟聽！」
方力申「係咩？唔知喎！不過我出年1月先出碟，如果係都怕有影響！」
Paco 「一切問題都搞掂晒，因為公司合併，所以要同HMV 再傾，等佢哋公司高層回港簽約就ok ！」
鄧麗欣「唔回應，咩都唔答！」
新碟停賣
連歌星都爭住喊減價，但唱片連鎖店HMV 卻偏偏逆市加拆賬收入。據知金牌因不肯妥協而同HMV 擘面，知情人士透露：「之前同金牌喺賣碟收益上三七分賬，本來相安無事，不過兩個月前，HMV 突然想變四六分賬！金牌梗係唔制啦！寧願放多啲喺街鋪賣啦！HMV 一向錢字行先，有錢就連唱片上架位都靚啲。」
金牌唔賣賬，變相益咗一直與HMV 關係甚佳、兼肯揼錢的環球唱片。記者上週到尖沙咀HMV 巡視，發現廣東碟架上，一眾金牌歌手新碟的確冇晒影，反而環球碟人多勢眾，連在銷量架上頭10位，佔了5隻都屬環球唱片發行。據知Paco 對新拆賬要求不肯讓步，金牌總經理Andy Lai 本週一向本刊透露：「我哋同HMV 係傾緊新合作計劃，暫時未有共識，希望盡快解決！」發言人打官腔，一哥古巨基就話：「我知道呢件事（HMV 冇得賣），好在而家嘅銷量我都好滿意（3萬銷量），不過都好希望可以有多啲地方賣嘅！」
轉戰街鋪
拆賬傾唔掂，唱片點都要賣，自從在HMV 消失後，金牌即時加碼街鋪出貨量。消息人士說：「金牌而家放多咗貨喺旺角、銅鑼灣啲街鋪，用批發價放，唔使幾日就賣晒！好過大鋪啲客人齋睇唔買。」咁又係，畀你買碟都揀間平啲先買啦！
實地踩場 漢口道HMV
記者到漢口道HMV 唔見金牌新碟，職員表示：「我哋冇賣金牌CD 兩個月，有好多客都問過，冇賣嘅原因就唔清楚！」HMV 發言人則說：「我哋正同金牌傾緊唔方便透露！」
旺角WideSight
旺角街鋪就見側田、基仔等新碟放在店內當眼處，希望以大包圍攻勢補救。
張敬軒尖沙咀HMV 《蘋果日報》圖片
Eason 銅鑼灣HMV 《蘋果日報》圖片
HMV 躉
環球旗下歌手全部都在HMV 舉行新碟宣傳，全程限人數，分批入店內見偶像。
林峯銅鑼灣WideSight 《蘋果日報》圖片
古巨基荃灣廣場《蘋果日報》圖片
街鋪黨
街鋪同商場宣傳就不限人數，途人可即時加入，fans 迫爆，古巨基新碟《Guitar Fever 》早前就安排在荃灣廣場搞簽唱會，遠就遠啲，好過俾人攃住搶。
街鋪唔憂做
唱片公司愈嚟愈入侵街鋪，將歌手新碟放入店內賣，一來價錢平均平HMV 20蚊，加上街鋪隔幾間又有密集式攻勢唔憂做！
街邊CD 鋪門外一定有部電視開到隔籬街都聽到，加上海報、人形紙板一定放到當眼處，全部自動波，相反HMV 則逐項計錢。
