馮仁昭四圍超：趙碩之性感Tomboy 男女通殺
鄭融、江若琳、趙碩之同陳偉霆等噚日喺西環出席彭發執導嘅新片《玩大咗》開鏡拜神儀式，片中鄭融、陳偉霆、趙碩之以及女新人陳柏旭大搞四角關係。鄭融同趙碩之扮演一對同性戀人，身材豐滿嘅趙碩之仲扮tom boy 添，但唔使紮胸上陣，反而會著好性感嘅衫色誘陳偉霆，目的係要畀鄭融知道天下男人都好色。
江若琳前晚錄影無線音樂台節目時，自爆為人任性，為尋真愛會採取主動。
陳偉霆噚日唔覺意踢爆鄭融有男友。
江若琳自認任性
鄭融話唔介意同趙碩之拍kiss 戲，佢仲好抵死咁話一定抽離唔到角色；反而陳偉霆一早知道冇得同鄭融咀嘴，仲話要向導演申請加場咀戲喎。問陳偉霆使唔使同女友Angelababy 報定案，佢話唔使，但一時口快快爆咗鄭融有男友，佢失驚無神問鄭融：「咁你有冇通知你過個呀?」鄭融即刻睩大隻眼望住陳偉霆話：「乜邊個呀？」之後陳偉霆知衰，即刻細細聲對住班記者話：「我唔敢講。」江若琳就同周柏豪扮演情侶，佢喺片中扮啤酒妹同拳手，制服仲好性感，江若琳話：「我唔識猜枚，平時好怕去嘈吵地方，去酒吧玩嘅人講嘢冇句真，所以收工就返屋企。」此外，江若琳前晚錄影無線音樂台嘅《Live House 》，佢自爆係個任性嘅人，當時媽咪反對佢入娛樂圈，但佢唔理咁多。問佢喺感情上係咪都係咁任性？佢話：「我可以為愛嘅人不顧一切，即使主動追求都唔介意，不過要先了解佢係咪有另一半。以前我俾人拒絕過，可能係我老套同太細路女。」
趙碩之雖然喺戲中扮tomboy ，但依然作性感打扮，並冇埋沒佢嘅天賦本錢。
