中環在線：吳光正千金膺亞洲商界女星
《華爾街日報》噚日公佈08年全球最值得關注嘅50位商界女性，有4位亞洲女強人入選。更加吸引華華嘅，係同時選出10位亞洲最值得關注嘅商界女性。榜上除咗有百度首席財務官（CFO ）李昕晢同美國私募基金德太投資（TPG ）馬雪征，華華留意到有兩粒新星──賭王愛女何超瓊（Pansy ）同吳光正囡囡吳宗恩（Jennifer ）。賭王都讚過Pansy 虎父無犬女，佢入選可以話係順理成章。咁Jennifer 呢？應該係後來居上，而且越戰越勇，加入連卡佛唔夠十年就坐上第二把交椅，市場人士都視佢為新一代時裝女王、明日嘅Joyce Ma 。今次連《華爾街日報》都留意到佢，睇嚟吳小姐的確耀眼。至於全球計50位商界女性中，排名最高嘅亞洲代表，係最多香港人識嘅人行副行長胡曉煉，排第4；其次係排第7嘅淡馬錫首席執行官何晶，佢老公就係新加坡總理李顯龍。另外兩位分別係日本DeNA Co 創辦人Tomoko Namba 同韓國Hann Corp 創辦人。
何超瓊
吳宗恩
08亞洲最值得關注10位商界女性
入選人：Shamshad Akhtar 公司：巴基斯坦銀行入選人：孫瑋 公司：摩根士丹利入選人：何超瓊 公司：美高梅MGM入選人：李昕晢 公司：百度入選人：馬雪征 公司：德太投資入選人：Chisato Nojiri 公司：Terumo Heart入選人：Yoshiko Shinohara 公司：Temp Holdings 入選人：Pia Singh 公司：DLF入選人：吳宗恩 公司：連卡佛入選人：張蘭 公司：俏江南資料來源：《華爾街日報》
